,,თავდაცვის მინისტრის ყოფილ მოადგილეს - დათა ახალაიას სანდრო გირგვლიანის საქმეზე წაუყენებენ ბრალს, რადგან დათა ახალაია არაერთ საქმეში ფიგურირებდა მანამ, სანამ ხელისუფლებაში ჩვენ მოვიდოდით. მათ შორის ერთერთი პირველი სანდრო გირგვლიანის საქმეა.

აღნიშნულ საქმეზე მიმდინარეობს სახვადასხვა ტიპის ქმედებები იმისთვის, რომ გამოძიება განახლდეს და ამ მხრივ მიმაჩნია, რომ საკმაოდ მნიშვნელოვნად წავიწიეთ წინ, თუმცა რაიმე ტიპის ინფორმაციის გამოქვეყნებისგან თვის ბოლომდე თავს შევიკავებ. თვის ბოლომდე ჩვენ მოვიწვევთ სანდრო გირგვლიანის მამას და ჩავაბარაბთ ანგარიშს, როგორ მიმდინარეობს გამოძიება და ამის შემდეგ უკვე ყველაფერი გახდება ცნობილი!..’’

მაინც რაში შეიძლება წაუყენონ ბრალი დათა ახალაიას?„ალიას“ გირგვლიანების ოჯახის ყოფილი ადვოკატი და აწ უკვე პარლამენტარი - შალვა შავგულიძე ესაუბრა:

-ბატონო შალვა, მაინც რაში შეძლება დათა ახალაიას ბრალი წაუყენონ?

-ამ ეტაპზე მე შემოვიფარგლები მხოლოდ იმ ყველაფრის კომენტირებით, რაც ევროსასმართლოს გადაწყვეტილებაში წერია. კერძოდ იქ გარკვევით არის ნათქვამი, რომ გამოძიებამ ვერ წარმოადგინა საფუძვლიანი არგუმენტები იმ ეჭვის გასაბათილებლად, რომ სუფრის წევრებსა და იმ ოთხ აღმსრულებელს შორის იყო სერიოზული კონტაქტი და კომუნიკაცია!.. სუფრის წევრი კი, მოგეხსენებათ დათა ახალაიაც იყო... ასე რომ, გამოძიებას ძალიან სერიოზულად შეუძლია, ამ მიმართულებით იმუშაოს. გარდა ამისა სააკაშვილის ხელისუფლებამ სრული იგნორირება გაუკეთა ჩვენს მოთხოვნას იმასთან დაკავშირებით, რომ დაკავებულები დაეკითხათ ჩვენი თანდასწრებით და ასევე, უარი გვითხრეს, გადმოგვცემოდა სატელეფონო ზარების თორმეტსაათიანი ჩანაწერი. სამაგიეროდ იცით შემდეგ რა აღმოჩნდა? საქმეში აღმოჩნდა სატელეფონო ჩანაწერების ფრაგმენტები და გაირკვა, რომ, როცა ჯერ კიდევ შინაგან სასქმეთა სამინისტროს მთავარი სამმართველო იძიებდა ამ საქმეს, მათ არათუ თორმეტსაათიანი, არამედ დანაშაულში ეჭვმიტანილთა ათდღიანი სატელეფონო ჩანაწერები ჰქონდათ ამოღებული და მერე ეს მასალა მათთვის სასურველ ფრაგმენტებად დაჭრეს და საქმეში ასე ჩადეს!.. ამას ემატება ისიც, რომ ბადრი პატარკაციშვილის სახლთან არსებული სათვალთვალო კამერის ჩანაწერებიდან მხოლოდ ხელისუფლებისთვის სასურველი 67-წამიანი მონაკვეთი ამოჭრეს!.. ასე რომ, გამოძიებას ყველაფერი წინ აქვს და ვფიქრობ, შესაბამისი ორგანოები შეცდომას არ დაუშვებენ...