საქართველოს ყოფილი პრემიერ-მინისტრი, ბიძინა ივანიშვილი თანამდებობის დატოვების შემდეგ, რუსულ „ფორბსს“ პირველ ინტერვიუს აძლევს.

ივანიშვილი „ვარდების რევოლუციის“ პერიოდს იხსენებს და საუბრობს იმ დახმარებაზე, რომელიც მან სააკაშვილის მთავრობას გაუწია:

„სააკაშვილს „ვარდების რევოლუციის“ პერიოდში ვხვდებოდი, მანამდე, სანამ იგი პრეზიდენტი გახდებოდა. მე მაშინ პარიზში ვცხოვრობდი, საქართველოში მიმდინარე ცვლილებებით აღფრთოვანებული ვიყავი.

მაშინვე საქართველოში ჩამოვფრინდი. მოსკოვის გავლით ჩავედი, მაშინ მოსკოვში ბიზნესთან დაკავშირებით მნიშვნელოვანი შეხვედრები მქონდა. მეკითხებოდნენ, რა ხდებოდა საქართველოში, მე კი ვამბობდი, რომ ცვლილებები სიტუაციას უკეთესისკენ შეცვლიდა და ახალ ადამიანებს უნდა ენდო.

მე ვფიქრობდი, რომ მოვიდა ადამიანთა ჯგუფი, რომლებიც ქვეყანას დასავლეთისკენ წაიყვანდა. ღამით არ მეძინა ხოლმე, ვფიქრობდი და ვადგენდი გეგმებს, როგორ დავხმარებოდი მათ. სააკაშვილთან პირველივე შეხვედრაზე ვთქვი, რომ აუცილებელი იყო თანამდებობის პირებისათვის ხელფასების მომატება.

მაშინ მინისტრების ანაზღაურება თვეში 10 დოლარი იყო, მე ვუთხარი, რომ თუ მინისტრს შვილის გამოკვება არ შეუძლია, მაშინ მის გუნდს ძალიან გაუჭირდებოდა კორუფციის აღმოფხვრა. ვუთხარი, რომ მზად ვიყავი ამისთვის ფული მიმეცა. შევთავაზე ფონდის ჩამოყალიბება, რათა ეს ყოველივე ქრთამის აღებას არ დამსგავსებოდა.

„სოროსის ფონდს“ ვიყენებდით, მაგრამ სოროსის წილი ამ ყოველივეში ძალიან მცირე იყო. მთლიანი თანხა, რაც ხელფასების მატებისთვის იყო საჭირო, ჩემი გახლდათ. თითქმის სამი წლის განმავლობაში, თანამდებობის პირები მაღალ ხელფასს ამ ფონდის საშუალებით იღებდნენ. ამასთანავე, არავინ არ იცოდა და ინტერესსაც არ იჩენდა, თუ საიდან მოდიოდა ეს თანხა.

მეორე ფონდი არმიის დასახმარებლად შეიქმნა. შენდებოდა ყაზარმები, იკერებოდა სამოსი ჯარისკაცებისთვის, რომლებიც მანამდე დახეულ სამოსში დადიოდნენ. მე მხოლოდ იმას ვაკონტროლებდი, რომ ამ ფულით იარაღი არ შეეძინათ. პოლიციასაც დავეხმარე იმ დროს“, - აღნიშნავს ივანიშვილი.