2006 წლის 25 დეკემბერს MyVideo.Ge სატესტო რეჟიმში გაეშვა. სოციალური ქსელის იდეოლოგიასა და WEB 2 ის პრინციპებზე დამყარებული სერვისი დარეგისტრირებულ მომხმარებელს ვიდეოფაილების სერვერზე ატვირთვის საშუალებას აძლევდა, რის შემდეგაც მომხმარებლის მიერ ატვირთული ვიდეორგოლი სანახავად ხელმისაწვდომი ხდებოდა ყველა მომხმარებლისათვის.

2009 წელს MyVideo.Ge-ს სერვისებს დაემატა ტელევიზიები LIVE რეჟიმში, 1 კვირიანი არქივითა და გადახვევის ფუნქციით. იმავე წელს, MyVideo.Ge გახდა პირველი ადგილის მფლობელი ქართულ ინტერნეტსივრცეში - Top.ge-ს წლის რეიტინგში ვიდეო პორტალმა ლიდერის პოზიცია დაიკავა.

2006 წლიდან დღემდე MyVideo.Ge-ს სერვისების ჩამონათვალი მკვეთრად გაიზარდა, დაემატა ისეთი ფუნქციები, როგორიცაა: მუსიკა, კინოთეატრი, ვიდეოს მოჭრისა და გადმოწერის ფუნქცია, LIVE სტრიმინგი (2012 წელს), ბრენდირებული არხები და პარტნიორული სისტემა - რომელიც მომხმარებლებს აძლევს საშუალებას მიიღოს შემოსავალი მისი ვიდეორგოლების გავრცელებით. პარტნიორული სისტემის საშუალებით თანხის გაცემა პირველად 2013 წელს მოხდა.

MyVideo.Ge-ს ხელმისაწვდომობის გაზრდის მიზნით დამზადდა მობილური აპლიკაცია MyVideo Mobile TV, როგორც iOS-ის, ასევე Android-ის ოპერაციული სისტემებისათვის. აპლიკაციის მეშვეობით მომხმარებელს საშუალება აქვს უკვე მობილური ტელეფონიდანაც უყუროს myvideo.ge-ზე განთავსებულ სხვადასხვა ქართულ ტელეარხს. აპლიკაციას გააჩნია შემდეგი ფუნქციები: ტელეარხების პროგრამის ნახვა, გადახვევისა და გაჩერების ფუნქცია, გადაცემების ძებნა პროგრამისა და დროის მიხედვით და გადაცემის დაწყების შეხსენება.

2013 წლის თებერვალში ერთ-ერთმა მსხვილმა აზერბაიჯანულმა საკაბელო ტელევიზიამ (KATV1) გამოთქვა MyVideo-სთან თანამშრომლობის ინიციატივა. მათი ინვესტიციისა და ერთობლივი მუშაობის შედეგად დამზადდა MyVideo-ს აზერბაიჯანული ვერსია - MyVideo.Az, რომელიც აზერბაიჯანელ მომხმარებელზეა გათვლილი.

MyVideo.Ge არა მხოლოდ სამომხმარებლო, არამედ სარეკლამო ბაზარზეც ინარჩუნებს ლიდერის პოზიციას ინტერნეტ სივრცეში. დღევანდელი მონაცემებით, MyVideo.Ge-ს ჰყავს 1 208 170 რეგისტრირებული მომხმარებელი და 500-ზე მეტი რეკლამის დამკვეთი და პარტნიორი ორგანიზაცია, რომლებთანაც სტაბილურად თანამშრომლობს წლების მანძილზე.

MyVideo.Ge მადლობას უხდის ყველა ერთგულ მომხმარებელს სერვისის სარგებლობისათვის და მომავალში ბევრ საინტერესო სიახლეს პირდება!