რუსული მედიის ინფორმაციით, ტოკიომ მოსკოვს ოფიციალურად შეატყობინა, რომ დააკავა რუსეთის მოქალაქე, რომელიც კურილის კუნძულებიდან, კერძოდ კუნაშირიდან, კუნძულ ჰოკაიდომდე ცურვით ჩააღწია და იაპონიაში თავშესაფარი მოითხოვა.

იაპონიის სასაზღვრო უწყება აცხადებს, რომ იგი საზღვრის უკანონო გადაკვეთისთვის დააკავეს და ახლა არკვევენ, როგორ მოახერხა მან იაპონიის ტერიტორიაზე მოხვედრა. შეგახსენებთ, რომ კუნაშირს და ჰოკაიდოს 25 კილომეტრი აშორებს.

რეკორდული ძალისხმევის მიუხედავად, რუსეთის მოქალაქეს თავშესაფრის მიცემაზე უარი უთხრეს. მას არც იაპონიაში დროებით დარჩენის ნებართვას მისცემენ. გავრცელებული ცნობებით, რუსეთის მოქალაქის ექსტრადირება 2 სექტემბერს მოხდება.