აშშ-ის შეიარაღებული ძალების ცენტრალური სარდლობის განცხადებით, განხორციელდა „ისლამური სახელმწიფოს“ იმ ტერორისტის ლიკვიდაცია, რომელიც ქაბულის აეროპორტთან მომხდარი აფეთქების ორგანიზებაში მონაწილეობდა.

„აშშ-ის სამხედრო ძალებმა კონტრტერორისტული ოპერაცია განახორციელეს „ისლამური სახელმწიფოს“ წინააღმდეგ. უპილოტო საფრენი აპარატით საჰაერო დარტყმა ავღანეთის ნანგარჰარის პროვინციაში მოხდა. პირველადი მონაცემებით, მოკლულია სამიზნე. ვიცით, რომ ოპერაციას სამოქალაქო მსხვერპლი არ მოჰყოლია“, - განაცხადა ცენტრალური სარდლობის პრესსპიკერმა ბილ ურბანმა.

CNN-ის ინფორმაციით, სამხედრო ოპერაცია ჯო ბაიდენის თანხმობით განხორციელდა.

შეგახსენებთ, ქაბულის აეროპორტთან განხორციელებული თავდასხმების სერიაზე პასუხისხმგებლობა „ისლამური სახელმწიფო - ხორასანის“ ფილიალმა აიღო.