"არასწორი დამოკიდებულებაა" - კალაძე ისევ ესტონეთის პრეზიდენტს აკრიტიკებს

პოლიტიკა - 11:51, 27 Aug, 2021

1474

თბილისის მერი, კახა კალაძე, რიტორიკას არ ცვლის და ისევ ესტონეთის პრეზიდენტს აკრიტიკებს - მისი თქმით, კერსტი კალიულაიდის განცხადებები "შეურაცხმყოფელია".

"ნამდვილად არასწორია ის დამოკიდებულება და განცხადებები, რაც ამ კონკრეტულ შემთხვევაში იყო გაკეთებული. ჩვენ ყველაფერს ვაკეთებთ იმისათვის, რომ რაც შეიძლება ძალიან სწრაფად გავხდეთ იმ დიდი ოჯახის წევრი, რასაც ევროპა და ევროკავშირი ჰქვია. უამრავი რეფორმა, წინსვლა გვაქვს ამ მიმართულებით და ასეთი განცხადებები, რა თქმა უნდა, სერიოზულ პრობლემას ქმნის, პირველ რიგში, ჩვენს ხალხში, ქართველებში, იმიტომ, რომ უჩენს სკეპტიციზმს. შესაბამისად, ასეთი განცხადებები არ არის მიზანშეწონილი“, - განუცხადა კალაძემ ჟურნალისტებს.

ხოლო ჟურნალისტის შეკითხვას, აფუჭებს თუ არა საქართველო-ესტონეთის ურთიერთობას "ისეთი არადიპლომატიური განცხადება, რომელიც თბილისის მერმა საქართველოსთან დაკავშირებით ესტონეთის პრეზიდენტის განცხადების საპასუხოდ გააკეთა კალაძე პასუხობს:
"ჰკითხეთ ესტონეთის პრეზიდენტს აფუჭებს თუ არა. აუცილებლად უნდა დაუსვათ ეს შეკითხვა ესტონეთის პრეზიდენტს. თქვენ პირველები უნდა იყოთ, იმიტომ, რომ ქართველები ხართ, ამ ქვეყნის მოქალაქეები ხართ, ასეთი შეურაცხმყოფელი განცხადებებით პირველ რიგში, თქვენ უნდა იყოთ გაღიზიანებული" ,- განაცხადა კალაძემ.

ცნობისთვის, ესტონეთის პრეზიდენტი კერსტი კალიულაიდი მიიჩნევს, რომ საქართველოს, უკრაინასა და მოლდოვას, შესაძლოა 20-წლიანი მუშაობა დასჭირდეთ ევროკავშირში გაწევრიანების მზაობის მისაღწევად. როგორც პრეზიდენტი აცხადებს, პირადად ის ევროკავშირის გაფართოების მომხრეა, თუმცა ამას დიდი დრო სჭირდება. ამ განცხადების საპასუხოდ თბილისის მერმა განაცხადა, რომ "ყველამ თავის ქვეყანას მიხედოს“.