გარდაცვლილი ზურაბ ჟვანიას მეგობარი, ქალთა ერთერთი ორგანიზაციის დამფუძნებელი და ზუგდიდში მიხეილ სააკაშვილისა და „ნაციონალური მოძრაობის“ წინააღმდეგ გამართული აქციების მუდმივი ორგანიზატორი ლალი ანთია „ასავალ-დასავალთან“ საუბარში აცხადებს, რომ დაკავებულმა კობა ხარშილაძემ, რომელიც ზურაბ ჟვანიას დაცვის წევრი იყო, მოკლულ პრემიერმინისტრს გასაღები ამოაცალა და ვაშლიჯვრის ოფისში მისი სეიფიდან სხვადასხვა ნივთები მოიპარა.

ლალი ანთია იხსენებს, რომ როცა კობა ხარშილაძეს ჟვანიას გარდაცვალების შემდეგ, პირველად შეხვდა, მას სწორედ გარდაცვლილის მობილური ეჭირა ხელში:

„ზურაბ ჟვანიას ჰქონდა ვანო ჩხარტიშვილის მიერ ნაჩუქარი ძვირადღირებული მობილური ტელეფონი, რომელსაც კანცელარიაში, თავის კაბინეტში, სეიფში, ინახავდა და ეს ტელეფონიც ხარშილაძემ წაიღო. მე რომ შევხვდი, მას სწორედ ის ტელეფონი ეჭირა ხელში.

რომ ვკითხე, ეს ტელეფონი რატომ წამოიღე ზურას კაბინეტიდან მეთქი?- ზურამ თვითონ მაჩუქაო, მითხრა. მიდი და არკვიე, მართლა აჩუქა თუ არა, კაცი მკვდარია... მე კი ვიცი არ უჩუქნია და და ხარშილაძემ ეს ტელეფონი ზურას სეიფიდან მოიპარა მისი მკვლელობის ღმეს. მკვდარი გაძარცვა ამ სატანამ, ამ მოროდიორმა! ჟვანია ნაჩუქარი ანტიკვარული იარაღების და სხვა ნივთებს სახლში ინავადა, მაგრამ ბუსა ცელქი ბავშვი იყო და მეუღლეს უთქვამს ზურასთვის, ესენი სადმე სხვაგან შევინახოთ, ბავშვმა რამე ხიფათი არ მოიწიოსო.

ამიტომ ზურამ ეს ნივთები წაიღო და თავისი პარტიის ვაშლიჯვრის ოფისში ინახავდა, დიდი სარდაფი იყო და იქ სეიფში ჰქონდა ჩაკეტილი. ზურას სიკვდილის ღამეს კობა ხარშილაძემ გახსნა ეს სეიფი და ყველაფერი წაიღო. მერე იქიდან წავიდა კანცელარიაში და იქაც გახსნა სეიფი, რომელიც ასევე გამოასუფთვა და ყველაფერი წაიღო... ხარშილაძემ მკვდარ ზურაბ ჟვანიას მანტოს ჯიბიდან ამოაცალა გასაღები და ასე გააღო როგორც ვაშლიჯვრის ოფისის, ისე კანცელარიის სეიფები!

სეიფები რომ გახსნა, ამის მერე ხარშილაძე გლდანში წავიდა თავის სახლში და დაწვა. ჟვანიას მეუღლე, რომ ურეკავდა ხარშილაძეს, ეს ატყუებდა, შეხვედრაზეა შესული, ხუთ წუთში დაგელაპარაკება, ათ წუთში დაგელაპარაკებაო.. რატომ ატყუებდა ხარშილაძე ნინო ქადაგიძეს? პირდაპირ ეთქვა, ჟვანიამ დამითხოვა და არ ვიცი სად არისო!..“, - აცხადებს ლალი ანთია გაზეთ „ასავალ-დასავალთან“ ინტერვიუში.