უზენაესი სასამართლოს თავმჯდომარის, კოტე კუბლაშვილის განცხადებით, იგი გიგი უგულავას საქმესთან დაკავშირებით, მოსამართლეზე ზეწოლის შესახებ ინფორმაციას არ ფლობს.

კუბლაშვილის განმარტებით, სასამართლოზე ზეწოლის შემთხვევაში მისი რეაგირება ადექვატური იქნებოდა. მისივე განმარტებით, მოსამართლის გადაწყვეტილებას ყველამ პატივი უნდა სცეს:

"თუკი ასეთი რამე ხდება, ყველამ კარგად იცით, როგორი იყო ჩემი რეაქცია ადრე, როცა ხდებოდა ასეთი ჩარევები და იგივე იქნება ახლაც, თუკი ასეთი რამ დადასტურდება. მე ჯერჯერობით არ მსმენია გარდა ამ განცხადებისა, რომ რაღაც მოხდა. თუკი დადასტურდა, რომ ასეთი რამე განხორციელდა, მე პირადად, უშულოდ ჩემი პასუხსიმგებლობით განვახორციელებ ძალიან მკაცრ კონტროლს იმაზე, რომ შემდგომში ასეთი რამე აღარ მოხდეს. მე არ ვიცი, ვინ დაიწყებს მოკვლევას. მოკვლევის უფლება ვისაც აქვს, მან უნდა დაიწყოს. მთავარია, რომ ჩემამდე მოვიდეს ეს საქმე და მითხრან - დიახ სწორედ ასე მოხდა.

ახლა თუ ვინმე იტყვის, რომ მე ან რომელიმე თავმჯდომარეს უნდა გვეთქვა მოსამართლისთვის, რომ ასე კი არა, სხვაგვარად გაეკეთებინა, ძალიან შეცდება, სწორედ ეს არის მოსამართლის დამოუკიდებლობაში ჩარევა. კეთილი უნდა ვინებოთ და პატივი ვცეთ მოსამართლის გადაწყვტილებას. არ შეიძლება, მოეწონოთ ერთი რაღაც გადაწყვეტილებაში და მეორეზე თქვა, რომ ცუდია. მათ მოსწონთ მხოლოდ ის, რაც მათთვის არის ხელსაყრელი და არ მოსწონთ რაც ობიექტურია, რადგან მათთვის ეს ხელსაყრელი შეიძლება არ იყოს", - აღნიშნა კუბლაშვილმა.

თბილისის მერს, გიგი უგულავას ორი დღის წინ სასამართლომ გირაოს სახით 50 ათასი ლარი დააკისრა, მოგვიანებით კი ცნობილი გახდა, რომ ზეპირი მოსმენის გარეშე, მოსამართლემ მას უფლებამოსილებაც შეუჩერა. დედაქალაქის მერის მოვალეობას კი პირველი ვიცე-მერი, სევდია უგრეხელიძე შეასრულებს.