ფეისბუქჯგუფი მედგიდი კვლავ დაიბლოკა. პირველად ჯგუფი 9 აგვისტოს დაიბლოკა. როგორც მაშინ მედგიდის დამფუძნებელი სოფო ჯაფარიძე ამბობდა, ჯგუფი მიზანმიმართული შეტევის გამო დაბლოკეს.

ამავე დღეს, ჯაფარიძემ ახალი ჯგუფი გააკეთა, თუმცა დღეს facebook-ზე აღარც ის იძებნება.

"მეგობრებო! კიდევ ერთხელ მიწევს ვისაუბრო ძალიან მძიმე და მტკივნეულ საკითხზე!

მედგიდი ისევ გაქრა/გააქრეს!

ყველამ იცით, რომ რამდენიმე დღის წინ შევქმენით ახალი ჯგუფი, რადგან ჩვენს იმედზე მყოფი ადამიანები მარტო არ დაგვეტოვებინა. ჯგუფმა უმოკლეს დროში მიაღწია წევრების კოლოსალურ რაოდენობას (75,000-მდე ადამიანი) და დღეს ის ისევ გააქრეს!

გამორიცხულია, რომ ასეთ მოკლე დროში, ყოველგვარი გაფრთხილების გარეშე, Facebook-ის მიერ გამქრალიყო ის, რაც მთელი ქვეყნის იმედია!

მე არ ვიცი ვინ დგას ამ ყველაფრის უკან, არც ის ვიცი, ვის რა უშავდება იმით, რომ უმოქმედო და სრულიად უნიათო სისტემის გვერდით ვდგავართ და ვიბრძვით ადამიანების სიცოცხლის(!) გადასარჩენად!

ამ უმძიმეს ვითარებაში, მედგიდი ერთადერთი ნათელი წერტილია და რა სამარცხვინოა, რომ შეუჩერებლად ცდილობენ ეს ნათელი წერტილიც გაუქრონ გამწარებულ, დაღლილ, ზურგშექცეულ და უიმედოდ დარჩენილ ადამიანებს!

ჯგუფის დაარსების დღიდან ჩვენ არავის ვებრძვით, პირიქით, ჩვენი დიდი წვლილი შეგვაქვს პანდემიის წინააღმედეგ ბრძოლაში! ჩვენი მიზანი არ არის ვაჩვენოთ, რომ ჩვენ მეტი შეგვიძლია ვიდრე სრულიად ჯანდაცვის სისტემას! არასოდეს ვყოფილვართ ჩასაფრებულის პოზიციიდან, ჩვენ ჩვენი პლატფორმა მხოლოდ იმ მიზნით დავაარსეთ, რომ ჩვენი მოსახლეობის გვერდით ვიდგეთ და ჩვენი წვლილი შევიტანოთ ადამიანების საკეთილდღეოდ.

და თქვენ? თქვენ რატომ აღგვიქვამთ კონკურენტებად და რატომ ცდილობთ თავიდან მოგვიშოროთ?

ჩემო ძვირფასო ადამიანებო, ვისაც გეიმედებით და ვისაც დიდ ზიანს გაყენებენ ჩვენი დიდი ოჯახის "მედგიდის" გაქრობით, იცოდეთ, რომ არ დავნებდებდით და არ დაგტოვებთ მარტო! აუცილებლად დავბრუნდებით ან ძველი ან ახლადშექმნილი ჯგუფით!

თუ ბრძოლაა, იყოს ბრძოლა! თუმცა, ქვეყანაში სადაც უამრავი პრობლემის წინააღმდეგ ერთად უნდა ვიბრძოდეთ, უსაშველოდ სამწუხაროა, რომ ვიბრძვით იმისათვის, რომ სახელმწიფოს გვერდით დავუდგეთ და ადამიანების სიცოცხლის შენარჩუნებისთვის ჩვენი წვლილის შეტანის საშუალება მოგვეცეს! თუმცა, ზემოთხსენებულიდან გამომდინარე ფაქტი ერთია, რომ მოცემულობა ისეთია, რომ ჩვენ არაადეკვატურ ბრძოლაში ვართ! ჩვენ მზად ვართ, ვიბრძოლოთ ხალხისთვის, ვისაც დედა, მამა, შვილი, ბებია, ბაბუა ან ნებისმიერი მნიშვნელოვანი და ახლო პირი "უკვდება" და თქვენ ვერაფერს აკეთებთ ამის შესაჩერებლად! - წერს სოფო ჯაფარიძე.