თბილისის ინფექციური საავადმყოფოს გენერალურმა დირექტორმა, თენგიზ ცერცვაძემ კორონავირუსის საწინააღმდეგო პრეპარატის, "ტოცილიზუმაბის“ საქართველოში შემოტანაზე ისაუბრა და განაცხადა, რომ პრეპარატის ახალი პარტია უკვე შემოვიდა, თუმცა ის მალევე გაიხარჯება.

როგორც ცერცვაძემ აღნიშნა, რომ მისთვის უცნობია, თუ როდის მოხდება მარაგის შევსება და ეს დამოკიდებული იქნება "ტოცილიზუმაბის“ მწარმოებელი კომპანიის, "როშის“ და საქართველოს ჯანდაცვის სამინისტროს აქტიურ ქმედებებზე, რათა დეფიციტის პირობებში, მოხერხდეს წამლის შემოტანა.

„როგორც ვიცი, საქართველოში 500 ფლაკონი არის შემოტანილი. „ტოცილიზუმაბზე„ დეფიციტი ორი მიზეზით შეიქმნა. პირველი - იმიტომ, რომ, როდესაც ჩვენ ჯერ კიდევ წელიწადნახევრის წინ ვხმარობდით ამ პრეპარატს და მოვუწოდებდით ყველას, რომ ეხმარათ, ჩვენი ოპონენტები, აი ისინი, ვისაც დღეს უხარია, რომ ბევრი შემთხვევა და გარდაცვალებაა, სასტიკად გვაკრიტიკებდნენ, ამბობდნენ, რომ ჩვენ ადამიანებზე ჩვენ ექსპერიმენტებს ვატარებდით და ეს პრეპარატი არ იყო აღიარებული მსოფლიოს მიერ.

ისინი მოუწოდებდნენ კლინიკებს, რომ ეს პრეპარატი არ გამოეყენებინათ. ამიტომ, სულ 7-8 კლინიკა იყენებდა „ტოცილიზუმაბს“. შემდეგ მოვახერხეთ დარწმუნება და ყველამ დაინახა, რომ გადარჩენილი პაციენტების რაოდენობა 24%-ით გაიზარდა. ამიტომაც, ერთბაშად ყველამ გადაწყვიტა ამ პრეპარატის გამოყენება. ბუნებრივია, მარაგი გაცილებით ნაკლებზე იყო გათვლილი და შეუძლებელი იყო იმის პროგნოზირება, რომ ყველა კლინიკა ჯადოსნური ჯოხის აქნევის სცენარით დაიწყებდა ამ პრეპარატის გამოყენებას“, - განაცხადა ცერცვაძემ.

მისივე თქმით, პრეპარატის დეფიციტის მეორე მიზეზია მსოფლიოს მასშტაბით ამ მედიკამენტის მცირე რაოდენობა.

„ჩვენ ერთ-ერთი პირველი ვიყავით, ვინც „ტოცილიზუმაბს“ ალღო აუღო. არ მერიდება, მსოფლიოში ერთ-ერთი პირველები ვიყავით, ვინც „ტოცილიზუმაბის“ ფართოდ გამოყენება დავიწყეთ. ახლა მსოფლიოს გარშემოც ყველამ ისწავლა, რომ ეს მედიკამენტი ძალიან კარგია და 3-5-ჯერ მისი მოხმარება გაიზარდა. ამას ერთადერთი კომპანია - „როში“ აწარმოებს და ის არ აღმოჩნდა მზად იმისთვის, რომ ასეთი მოთხოვნა დაეკმაყოფილებინა. მსოფლიოსთან შედარებით, საქართველოში ამ პრეპარატის დეფიციტი ნაკლებად არის“, - აღნიშნა თენგიზ ცერცვაძემ.