პროკრემლისტური გამოცემა კომსომოლსკაია პრავდას კორესპონდენტი და პროპაგანდისტი, დარია ასლამოვა ბათუმში ერთ-ერთ სასტუმროში იმყოფება. იგი კოვიდით არის ინფიცირებული.

მას საქართველოზე არაერთი გადაცემა აქვს მომზადებული. მაგალითად, აჭარას პირდაპირ ოსმანური იმპერიის ნაწილად მოიხსენიებს, რომელიც მხოლოდ დროებით არის საქართველოს შემადგენლობაში.

კრემლის იდეოლოგი ასლამოვა ხშირად სტუმრობს საქართველოს ოკუპირებულ ტერიტორიებსაც.

დღეს კი ირკვევა , რომ იგი რამდენიმე დღეა ბათუმშია. მან სტატუსი საკუთარ სოციალურ გვერდზე დაწერა.

"SOS! დელტა შტამი! ბათუმის სასტუმროში ვწევარ. ვინ იცნობს ჯანდაცვის ქართულ სისტემას? ჭაჭა ხომ არ მიშველის? ვერ ვტოვებ საქართველოს - ვერც ოფიციალურად და ვერც ფიზიკურად, რადგანაც ვწევარ. აქ რა ვაკეთო?", - წერს ასლამოვა.

ასლამოვას პოსტის კომენტარებში რამდენიმე ფეისბუქმომხმარებელმა აღშფოთება გამოთქვა იმის გამო, რომ ის საქართველოში შემოუშვეს. ზოგიერთმა კომენტარებში შინაგან საქმეთა სამინისტრო და სახელმწიფო უსაფრთხოების სამსახური მონიშნა, სიტუაციაში გასარკვევად.