საქართველო ბოლო 7 დღის განმავლობაში სიკვდილობის მაჩვენებლით მსოფლიოში მე-5 ადგილზეა...მანამდე 4 ისეთი ქვეყანაა, გეოგრაფია კარგად თუ არ იცი, შეიძლება არც გქონდეს გაგონილი

საქართველო ბოლო 7 დღის განმავლობაში სიკვდილობის მაჩვენებლით მსოფლიოში მე-5 ადგილზეა...მანამდე 4 ისეთი ქვეყანაა, გეოგრაფია კარგად თუ არ იცი, შეიძლება არც გქონდეს გაგონილი - მაია ბუწაშვილი

COVID-19 - 22:15, 09 Aug, 2021

1831

საქართველო ბოლო 7 დღის განმავლობაში სიკვდილობის მაჩვენებლით მსოფლიოში მე-5 ადგილზეა“, – ამის შესახებ კლინიკა „ნეოლაბის“ ექიმი, ინფექციონისტი მაია ბუწაშვილი სოციალურ ქსელში წერს.

იგი ამბობს, რომ ადრე აშშ და ევროპის ქვეყნები ჩვენ „გვთხოვდნენ რჩევებს კლინიკურ მენეჯმენტთან დაკავშირებით“, მათ ეს რჩევები გაითვალისწინეს და სიკვდილობის მაჩვენებელი ჩვენზე ბევრად უფრო გაუმჯობესებული აქვთ. ბუწაშვილი ექიმებს აღნიშნული რჩევების გათვალისწინებას, ხოლო საზოგადოებას ვაქცინაციის პროცესში ჩართვისკენ მოუწოდებს, რადგან „უამრავი ადამიანი, ვისაც განსაკუთრებით მაღალი აქვს გართულებების და სიკვდილის რისკი, დღემდე აუცრელია“.

„საქართველო ბოლო 7 დღის განმავლობაში სიკვდილობის მაჩვენებლით მსოფლიოში მე-5 ადგილზეა. მანამდე 4 ისეთი ქვეყანაა, გეოგრაფია კარგად თუ არ იცი, შეიძლება არც გქონდეს გაგონილი.

ჩვენ გვახსოვს, რომ აშშ და ევროპის ქვეყნები ჩვენ „გვთხოვდნენ რჩევებს კლინიკურ მენეჯმენტთან დაკავშირებით“ და ისე კარგად იმეცადინეს ამ ჩვენი რჩევებით, რომ სიკვდილობის მაჩვენებელი ჩვენზე ბევრად უფრო გაუმჯობესებული აქვთ.

იქნებ ეს რჩევები ჩვენ თვითონვე გამოვიყენოთ და ამდენი ადამიანი არ დაიღუპოს კოვიდით:((( იმაზე აღარაფერს ვიტყვი, რომ უამრავი ადამიანი, ვისაც განსაკუთრებით მაღალი აქვს გართულებების და სიკვდილის რისკი, დღემდე აუცრელია:((.

ოპონენტები ნუ მოიშველიებთ სიკვდილობის ჯამურ ციფრებს პანდემიის დაწყებიდან დღემდე. ეს მაღალი მაჩვენებლები იმ ქვეყნებში იყო მაშინ, როცა ჯერ არაფერი იყო ცნობილი კოვიდის მართვაზე და უამრავი შეცდომა იყო კლინიკურ მენეჯმენტში, სანამ დაგროვდა გამოცდილება. ჩვენ კი სწორედ იმ ქვეყნების მიერ დაგროვილი გამოცდილების და ცოდნის გაზიარების მიუხედავად გავასწარით სიკვდილობის მაჩვენებლებლებით.

ამიტომ ნაადრევ მეტიჩრობას ჯობდა და ახლაც ჯობია ყველა შემთხვევის დეტალური ანალიზი ხდებოდეს და შემდეგ რეაგირება, რომ სიტუაცია გამოსწორდეს“, – წერს ბუწაშვილი