პრემიერ-მინისტრის დღევანდელ განცხადებას საჯარო მოხელეების ხელფასების მომატებასთან დაკავშირებით ენმ-ს წევრი ნიკა ობოლაძე საზოგადოების დაცინვას უწოდებს. მისი თქმით, საზოგადოებამ 2 ოქტომბერს რეფერენდუმის მეშვეობით უნდა გადაწყვიტოს როგორი ხელისუფლება სურს - ის ვინც მერებისა და გამგებლების ხელფასებზე საუბრობს მძიმე ეკონომიკური პირობების ფონზე თუ ხელისუფლება, რომელიც კოალიციური იქნება:

"იმაზე საუბარი, რომ თითქოს ჩვენი მერები და გამგებლები არიან სოციალურად შეჭირვებულები, არის აბსოლუტური არაადეკვატურობა და საზოგადოების დაცინვა.

2 ოქტომბრის რეფერენდუმი არის რეფერენდუმი მათ შორის, ამ შეკითხვით - როგორი ხელისუფლება გვინდა გვყავდეს, ხელისუფლება, რომელიც ამ ეკონომიკურ სიტუაციაში საუბრობს მერების და გამგებლების ხელფასზე, თუ გვინდა კოალიციური ხელისუფლება, რომელიც აკონტროლებს ერთმანეთს.

უნდა მოხდეს ამ ადამიანების ოპტიმიზაცია, ვინც მუშაობს უნდა დარჩეს სამსახურში და გაეზარდოს ხელფასი, და ის, ვინც მხოლოდ პოლიტიკური ნიშნით არის გაფორმებული, მან უნდა სცადოს და სამსახური იპოვოს კერძო სეტორში," - განაცხადა ნიკა ობოლაძემ.