მოვუწოდებთ რუსეთს, შეასრულოს ვალდებულებები ცეცხლის შეწყვეტის შეთანხმების შესაბამისად, მისცეს ევროკავშირის სადამკვირვებლო მისიას შეუფერხებელი წვდომა ორივე ოკუპირებულ რეგიონში და უარი თქვას ბორდერიზაციის პროცესზე

მოვუწოდებთ რუსეთს, შეასრულოს ვალდებულებები ცეცხლის შეწყვეტის შეთანხმების შესაბამისად, მისცეს ევროკავშირის სადამკვირვებლო მისიას შეუფერხებელი წვდომა ორივე ოკუპირებულ რეგიონში და უარი თქვას ბორდერიზაციის პროცესზე - ევროპარლამენტარები

პოლიტიკა - 18:33, 07 Aug, 2021

1438

აგვისტოს ომის 13 წლისთავთან დაკავშირებით ევროპარლამენტარები საერთო მიმართვას ავრცელებსნ, სადაც ხაზგასმით არის აღნიშნული, რომ ისინი ერთგულებას გამოხატავენ საქართველოს სუვერენიტეტისა და ტერიტორიული მთლიანობის მიმართ და მტკიცედ აქვთ გადაწყვეტილი, წვლილი შეიტანონ კონფლიქტის მშვიდობიან მოგვარებაში. ევროპარლამენტარები ასევე მოუწოდებენ რუსეთის ფედერაციას, შეასრულოს ცეცხლის შეწყვეტის შესახებ შეთანხმების პირობები, ასევე ევროკავშირის სადამკვირვებლო მისიას შეუფერხებელი წვდომა მისცეს ორივე ოკუპირებულ რეგიონში, უარი თქვას ბორდერიზაციის პროცესზე და დაასრულოს ადამიანის უფლებების სისტემატიური დარღვევები:

„ჩვენ მტკიცედ ვართ ერთგული საქართველოს სუვერენიტეტისა და ტერიტორიული მთლიანობის მის საერთაშორისოდ აღიარებულ საზღვრებში და მტკიცედ გვაქვს გადაწყვეტილი, წვლილი შევიტანოთ კონფლიქტის მშვიდობიან მოგვარებაში, მათ შორის ევროკავშირის შუამავლობით 2008 წლის 12 აგვისტოს ცეცხლის შეწყვეტის შესახებ შეთანხმების სრულად განხორციელებით, ჟენევის საერთაშორისო დისკუსიებით, ევროკავშირის სადამკვირვებლო მისიის საქმიანობით და სამხრეთ კავკასიაში და საქართველოში კრიზისის საკითხებში ევროკავშირის სპეციალური წარმომადგენლის ძალისხმევით.

სამწუხაროდ, აფხაზეთისა და ცხინვალის რეგიონის/სამხრეთ ოსეთის მცხოვრებლებს არ შეუძლიათ, განახორციელონ თავიანთი პოლიტიკური და სამოქალაქო უფლებები, როგორც საქართველოს მოქალაქეებს და არ შეუძლიათ, ისარგებლონ ევროკავშირთან ასოცირების ხელშეკრულებით გაძლიერებული სოციალურ-ეკონომიკური განვითარებით, რადგან ისინი კვლავ განიცდიან რუსული ოკუპაციით შექმნილ უბედურებას. მათი ტანჯვა კიდევ უფრო გამწვავებულია „კოვიდ-19“-ის პანდემიის შედეგად

მოვუწოდებთ რუსეთის ფედერაციას, შეასრულოს თავისი ვალდებულებები ცეცხლის შეწყვეტის შეთანხმების შესაბამისად. გარდა ამისა, ჩვენ მოვუწოდებთ რუსეთის ფედერაციას, როგორც ქვეყანას, რომელიც ახორციელებს დე ფაქტო კონტროლს აფხაზეთსა და ცხინვალის რეგიონზე/სამხრეთ ოსეთზე (როგორც ეს ხაზგასმით აღინიშნა ადამიანის უფლებათა ევროპულმა სასამართლომ 2021 წლის 21 იანვრის გადაწყვეტილებით, საქართველო რუსეთის წინააღმდეგ სახელმწიფოთაშორის საქმეში), მისცეს ევროკავშირის სადამკვირვებლო მისიას შეუფერხებელი წვდომა ორივე ოკუპირებულ რეგიონში, უარი თქვას აქტიური „ბორდერიზაციის“ პროცესზე, დაასრულოს ადამიანის უფლებების სისტემატური დარღვევები – განსაკუთრებით ისეთები, რომლებიც ჩადენილია ეთნიკური ნიშნით, რათა უზრუნველყოფილი იყოს, რომ ასეთი დარღვევები დაისჯება მართლმსაჯულების წინაშე და ნება დართოს იძულებით გადაადგილებულ პირთა უსაფრთხო და ღირსეულ დაბრუნებას წინაპრების მიწაზე“, - ნათქვამია ევროპარლამენტარების ერთობლივ წერილში.