საქართველოში აშშ-ის ელჩმა კელი დეგნანმა რუსეთის საგარეო უწყების წარმომადგენლის განცხადებაზე გააკეთა კომენტარი და აღნიშნა, რომ პირველი, რაც ოკუპანტმა სახელმწიფომ უნდა გააკეთოს, თავისი სამხედრო ძალების საქართველოს ტერიტორიიდან გაყვანაა. დეგნანის განმარტებით, ეს იქნება ნამდვილი ნიშანი იმისა, რომ რუსეთი სერიოზულად არის განწყობილი და მხოლოდ დეზინფორმაციას არ ეწევა:

„რუსეთი იმ დონეზეა მზად საქართველოსთან ურთიერთობების აღსადგენად, რამდენადაც ამისთვის მზად არის ქართული მხარე. ვფიქრობ, ქართველებს რუსეთისგან მსგავსი გზავნილი ადრეც მოუსმენიათ. პირველი, რაც რუსეთმა უნდა გააკეთოს, არის საქართველოს ტერიტორიიდან თავისი ძალების გაყვანა. ეს იქნება იმის ნამდვილი ნიშანი, რომ რუსეთი სერიოზულად არის განწყობილი და უბრალო დეზინფორმაციას არ ეწევა. ქართველებისთვის ძალიან მნიშვნელოვანია დაინახონ, რომ რუსეთს გაჰყავს თავისი ძალები ოკუპირებული ტერიტორიებიდან, აუქმებს ცხინვალისა და აფხაზეთის აღიარებას და დაუყოვნებლივ ხსნის წვდომას ჰუმანიტარული დერეფნებზე. ჟენევის საერთაშორისო დისკუსიები არის დიალოგის მექანიზმი და თუ რუსეთი გამოიყენებს ამ მექანიზმს უფრო ეფექტიანად და კეთილსინდისიერად, შესაძლოა, დავინახოთ მეტი პროგრესი ამ კონფლიქტების დარეგულირებაში“, - განაცხადა კელი დეგნანმა.

შეგახსენებთ, გუშინ რუსეთის საგარეო საქმეთა სამინისტროს წარმომადგენელმა გააკეთა განცხადება და თქვა, რომ რუსეთი მზად არის, საქართველოსთან ურთიერთობები აღადგინოს, რამდენადაც ამისთვის მზად არის ქართული მხარე.