მზად ვართ აღვადგინოთ ურთიერთობები, რამდენადაც ამისთვის მზად არის ქართული მხარე - რუსეთის საგარეო უწყების უწყების წარმომადგენელი

პოლიტიკა - 23:43, 05 Aug, 2021

2565

რუსეთის საგარეო საქმეთა სამინისტროს ინფორმაციისა და პრესის დეპარტამენტის დირექტორის მოადგილემ, ალექსანდრ ბიკანტოვმა რუსეთ-საქართველოს ომის წლისთავთან დაკავშირებულ ბრიფინგზე განაცხადა, რომ მოსკოვი მზად არის ქვეყნებს შორის ურთიერთობების აღსადგენად, იმდენად, რამდენადაც ქართული მხარე არის ამისთვის მზად. მან აქვე აღნიშნა, რომ ყოვლად უპერსპექტივოა საუბარი სამხრეთ ოსეთისა და აფხაზეთის საქართველოში რეინტეგრაციაზე.

"რუსეთში არასდროს სვამდნენ ტოლობის ნიშანს მიხეილ სააკაშვილის დანაშაულებრივ რეჟიმსა და ქართველ ერს შორის. მზად ვართ ჩვენს ქვეყნებს შორის ურთიერთობების აღსადგენად, იმდენად, რამდენადაც ქართული მხარე არის ამისთვის მზად. ჩვენ იმედი გვაქვს, რომ საღი აზრი გაიმარჯვებს და ჩვენი ქართველი პარტნიორები მეზობლებთან ურთიერთობების დამყარებას ინტერესთა ბალანსის გათვალისწინებით დაიწყებენ.

ეს ასევე ეხება თბილისის საგარეო "კურატორებს". დიდი ხანია დადგა დრო რომ მათ უარი თქვან აფხაზეთისა და სამხრეთ ოსეთის საქართველოში "რეინტეგრაციის" ხაზზე. იმის მაგივრად, რომ რეალობისგან მოწყვეტილი თეზისები შტამპონ, რასაც ადგილი ჰქონდა დასავლეთის ზოგიერთი ქვეყნის მხრიდან წარმოდგენილ საერთო განცხადებაში, გაეროს უშიშროების საბჭოს სხდომაზე, რომელიც 2008 წლის აგვისტოს მოვლენების წლისთავს ეხებოდა, მათ უმჯობესია თბილისს სტიმული მისცენ, რომ სოხუმთან და ცხინვალთან თანასწორუფლებიანი, ურთიერთპატივისცემაზე დამყარებული დიალოგი დაამყაროს და აწარმოოს," - აცხადებს კრემლის ჩინოვნიკი.