19 აპირილის შეთანხმების ანულირებასთან დაკავშირებით პრეზიდენტ ზურაბიშვილის განცხადებას არასაკმარისი უწოდა "გირჩი - მეტი თავისუფლების" ლიდერმა ზურაბ ჯაფარიძემ. მისი თქმით, იმ შედეგების ფონზე, რასაც ხელისუფლების ქმედება გამოიწვევს შეთანხმების ანულირებით, პრეზიდენტის განცხადება ბევრად მკაცრი უნდა ყოფილიყო:

კარგი იყო ის განცხადება რაც გააკეთა ცალსახად, თუმცა მე არ მგონია, რომ ეს რაღაც სერიოზული დაპირისპირება იყოს „ქართულ ოცნებასთან“, ან ბოლომდე ადეკვატური იყოს იმ რეალობის, რა რეალობაშიც ჩვენ ვართ. მაშინ, როდესაც „ქართულმა ოცნებამ“, ფაქტობრივად, ჩააგდო 19 აპრილი შეთანხმება, დრო გაწელა, გამოიყენა ეს დრო, რომ ჩაებეტონებინა იგივე კლანი იუსტიციის უმაღლეს საბჭოში და უზენაეს სასამართლოში, ამ მოცემულობაში იმის თქმა, რომ სიტყვა უნდა დაიცვა საკმარისი არ არის. მგონია, რომ ბევრად მკაცრი განცხადება უნდა ყოფილიყო, - განაცხადა ჯაფარიძემ.

შეგახსენებთ, პრეზიდენტმა სალომე ზურაბიშვილმა "ქართული ოცნების" მიერ 19 აპრილის შეთანხმების ანულირებასთან დაკავშირებით სპეციალური განცხადება გააკეთა, სადაც აღნიშნა, რომ დოკუმენტით ნაკისრი ვალდებულებები უნდა შესრულდეს. მან ასევე აღნიშნა, რომ დოკუმენტის ანულირებაზე პასუხისმგებლობას ვერ აიღებს.