„ერთიანი ნაციონალური მოძრაობის“ ერთ-ერთი ლიდერისა და საპარლამენტო უმცირესობის წევრის, დავით დარჩიაშვილის განცხადებით გიგი უგულავასთვის აღმკვეთი ღონისძიების სახით წინასწარი პატიმრობის შეფარდება საერთაშორისო ასპარეზზე საქართველოსთვის არამომგებიანი იქნება.

დარჩიაშვილი „ნიუპოსტთან“ საუბრისას აღნიშნავს, რომ ვილნიუსის სამიტის შემდეგ ხელისუფლებამ პოლიტიკური დევნის ახალი ეტაპი დაიწყო, რაც მკაფიოდ გამოიხატება ყოფილი პრემიერმინისტრის, ვანო მერაბიშვილის ირგვლივ მიმდინარე საქმეში.

- გიგი უგულავას სასამართლო პროცესზე ბრალდებამ აღმკვეთი ღონისძიების სახით წინასწარი პატიმრობა მოითხოვა, რამდენად ელოდით მსგავს გადაწყვეტილებას და თქვენი აზრით, დააკმაყოფილებს თუ არა სასამართლო ამ მოთხოვნას?

- ვერ ვიტყვი სასამართლოზე და იმ მოსამართლეზე, რომელიც განიხილავს ამ საქმეს რა ტიპის და დონის გავლენა აქვთ, მაგრამ მინდა ხაზი გავუსვა, აშკარაა ვილნიუსის სამიტის შემდეგ პოლიტიკურად მოტივირებული დევნისა და დაჭერების ახალი ტალღა დაიწყო. ეს დევნა ვერბალურიც არის, ფიზიკურიც, მათ შორის პრლამენტში და პარალელურად ის, რაც ჩვენ ვნახეთ ვანო მერაბიშვილთან დაკავშირებით. ახლა უგულავაც, სადამდე გააგრძელებენ ამას არ ვიცი. დიდ წინააღმდეგობრივ ეტაპში შედის დღევანდელი ხელისუფლება და ეს პრობლემა როგორ გაუმწვავდებათ, ამას ყველა დავინახავთ.

- იმ შემთხვევაში, თუ სასამართლომ დააკმაყოფილა პროკურატურის მოთხოვნა და გიგი უგულავას წინასწარი პატიმრობა შეუფარდა, მოქმედი მერის დაპატიმრება რა გამოძახილს ჰპოვებს საერთაშორისო საზოგადოებაში?

- სამწუხაროდ, მიუხედავად იმისა, რომ დედაქალაქის მერის, მას შემდეგ რაც ის არჩევითი გახდა, თანამდებობის პოლიტიკური წონა ძალზედ დიდია ქვეყანაში, მას არ იცავს იმუნიტეტი და არ არის გამორიცხული, რომ იგი დააკავონ, მაგრამ ეს იქნება პოლიტიკურად მოტივირებული, წინასწარი პატიმრობის შეფარდება მოქმედი მერისათვის, სხვა არაფერია, თუ არა პოლიტიკურად მოტივირებული ნაბიჯი. წინასწარ პატიმრობას რაც განსაზღვრავს, ადამიანის მიმალვის საფრთხე ან მოწმეებზე ზეწოლის საფრთხე, არცერთი არ არის. ჩანს, რომ ეს არის მხოლოდ პოლიტიკური ნაბიჯი, გამიზნული იმისათვის, რომ ძალიან აქტიური ადამიანი ჩამოაცილონ პოლიტიკას და მეორე, კიდევ ერთი მცდელობა განახორციელონ „ერთიანი ნაციონალური მოძრაობის“ დეზორიენტაციისა და დემორალიზაციისთვის.

- მსგავსი ნაბიჯები დაბრკოლებებს ხომ არ წარმოშობს 2014 წლის აგვისტოში ევროკავშირთან ასოცირების ხელმოწერის საქმეში?

- აუცილებლად წარმოშობს და როდესაც ვსაუბრობდი, რა ტიპის მწვავე პრობლემურ სფეროში შედის ხელისუფლება, ეგეც ვიგულისხმე. იმიტომ, რომ მორალს და სამართლიანობას თავი რომ დავანებოთ, მიდიან ძალიან არაპრაგმატული გზით, თუ ამ ქვეყნის ინტერესებს ემსახურებიან და არა პირადი შურისძიების მოტივებს. რა თქმა უნდა ის საქმეები, რაშიც არის კითხვის ნიშნები, უნდა გამოიძიონ, ყველაფერი უნდა აიწონოს და დაიდოს. მაგრამ წინასწარ დასკვნების გამოტანა, რასაც ადგილი აქვს ხოლმე, მათი მხრიდან, ვინ არის დამნაშავე და ვინ არა, ამის კეთება მხოლოდ ერთი მიმართულებით, „ნაციონალური მოძრაობის წინააღმდეგ“, პლიუს პროკურატურის მიერ ზეწოლის მეთოდებით, პატიმრობიდან დაწყბეული, უკანონო გატაცებებით დამთავრებული, ფაქტობრივად რაც ვანო მერაბიშვილის შემთხვევაში ხდება, ეს ყველაფერი პირდაპირ შეუშლით ხელს ქართულ-ევროპული ურთიერთობების პროგრესულ განვითარებაში. რატომ აკეთებენ ამას?! ეს არის მართლაც არაშორსმჭვრეტელობა, როგორც ვთქვი, თუ ეს არის ფარული დაკვეთა, რომ საბოლოო ჯამში, იანუკოვიჩის მსგავსად რუსეთის გზას დაადგნენ და რუსეთის მეტი სხვა არჩევანი არ დატოვონ?

- ჰერმან ვან რომპეიმ გუშინ განაცხადა, რომ შესაძლოა საქართველოსა და ევროკავშირს შორის ასოცირების ხელშეკრულების ხელმოწერა დაჩქარდეს, როგორ შეაფასებდით ამ განცხადებას?

- ეს რეალური იქნება მხოლოდ იმ შემთხვევაში, თუ საღი და ნორმალური პოლიტიკა ექნება ხელისუფლებას. იმიტომ, რომ ევროკავშირს ისე უნდა როგორც არასდროს, რომ საქართველოსთან წარმატებით განახორციელოს ეს, მითუმეტეს უკრაინულ ფონზე, ესმით თუ რა ზეწოლები არის რუსეთის მხრიდან იმ ქვეყნებზე, რომლებსაც ევროკავშირთან ასოცირება სურთ. ეს უნდათ რომ გააკეთონ, თან მითუმეტეს, რომ მომავალი არჩევნებია ევროპარლამენტში და ახალი კომისია იქმნება, სურთ, რომ ახლავე დასრულდეს ბაროზოს თავმჯდომარეობით ეს პროცესი. ეს ვერ მოხდება, ამ ყველაფრის ხარჯზე. ასეთი ნაბიჯები ძალიან სათუოს ხდის პროგრესს ამ მიმართულებით. ანუ ხელისუფლების მხრიდან ახალი ტალღა დევნისა, „ნაციონალური მოძრაობის“ მიმართ.

- როდის დაბრუნდება „ნაციონალური მოძრაობა“ საკომიტეტო მოსმენებზე და სესიებზე?

- იქნება სხდომა, ყველა ის მცდელობა, რომ რაციონალურ კალაპოტში გადავიტანოთ ურთიერთობები, მთავრდება ხოლმე ასეთი სკანდალური ნაბიჯებით ხელისუფლების მხრიდან. ამაზე მსჯელობა არის საჭირო.

- კონსულტაციები დავით ბაქრაძესა და დავით უსუფაშვილს შორის გამოიღებს შესაბამის შედეგს?

- პირველ რიგში, ეს მსჯელობა ჩვენს პოლიტსაბჭოზე გაიმართება და იქ გადავწყვეტთ როგორ ვიმოქმედოთ მოცემულ ვითარებაში.

ანანო კვაჭანტირაძე