იმ დროს, როდესაც ოკუპაციის შესახებ კანონის დამრღვევი რუსი მომღერალი ლევ ლეშენკო საქართველოში პოლიციის ესკორტის თანხლებით გადაადგილდება, საოკუპაციო რეჟიმი კი ჩორჩანის ტეროტირიაზე ქართული საგუშაგოს გაუქმებას ცდილობს და ტერიტორიაზე მძიმე ტექნიკას ანთავსებს, ახლა აღარ ჩანან ის კუნთმაგარი ბიჭები, რომლებიც 5 ივლისს საკუთარ "ეროვნულ ღირსებასა და ვაჟკაცობას" იცავდნენ და ეროვნული სულის გადარჩენის მიზნით უდანაშაულო ადამიანებს ფიზიკურად უსწორდებოდნენ.

თუმცა, ეს საზოგადოებისთვის გასაკვირი ნამდვილად არაა, რადგან მოძალადე ჯგუფებმა პარლამენტის წინ აღმართული ევროკავშირის დროშა ჩამოგლიჯეს, რამაც ყველა იმაში დაარწმუნა, რომ მათ არა ევროინტეგრაცია, არამედ ჩრდილოვანი მმართველობა სურთ, ამიტომ კონფლიქტის ზონაშიც არაფერი ესაქმებათ და არც საოკუპაციო რეჟიმის წარმომადგენლებს დაუწყებენ დევნას.

ამასობაში კი რუსეთი საოკუპაციო ხაზთან ნიადაგს იმყარებს, რათა უფრო და უფრო გააფართოვოს ოკუპირებული საზღვრები.

ანტისაოკუპაციო მოძრაობის "ძალა ერთობაშიას" ლიდერის დავით ქაცარავას განცხადებით, ოკუპანტების ქმედება ან გარკვეული დაშინების მეთოდია ან საქმე რუსულ სპეცოპერაციასთან გვაქვს:

"ჩორჩანის პოსტს აი ამ თხრილებთან ჰყოფს მხოლოდ ოკუპირებული წნელისი, ჩვენ ვვარაუდობთ, რომ ეს შეიძლება იყოს მზადება ჩვენი ჩორჩანის პოსტის ფორსირებისთვის და მისი მოშლისთვის. აქედან შეიძლება იწყებოდეს ეს სპეცოპერაცია და მეორე, რაღაც დაშინების მეთოდს წააგავს. პირველი ვერსია ბევრად სიცოცხლისუნარია", - განაცხადა ქაცარავამ.