თბილისის საკრებულოს თავმჯდომარეობის კანდიდატი გაერთიანებული ოპოზიციიდან ელენე ხოშტარია ქალაქის მასშტაბით სიძულვილის პლაკატების გაკვრის ფაქტს გამოეხმაურა და აღნიშნა, რომ ეს ქმედება საზოგადოებისა და ამომრჩევლის შეურაცხყოფაა, ზიზღის კამპანია და ოცნების წინასაარჩევნოდ გადადგმული ნაბიჯი, რომელიც წარმოუდგენელი ცინიზმია და ქვეყნის ნგრევას ემსახურება:

"მინდა გამოვეხმაურო, იმ ბინძურ კამპანიას, რომელიც "ქართულმა ოცნებამ" დაიწყო, როგორც კი ჩაეშვა წინასაარჩევნო კამპანია, ჩვენ ვნახეთ, რომ გუშინ მთელი ღამის განმავლობაში ქალაქში გააკრეს ზიზღის პლაკატები. პირველ რიგში, ეს არის საზოგადოების, ამომრჩევლის შეურაცხყოფა, მიუხედავად იმისა, თუ ვის როგორი პოლიტიკური პოზიცია აქვს.

ვხედავთ, რომ ეს ზიზღის და სიძულვილის კამპანია აგრძელებს ჟურნალისტებსა და აქტივისტებზე თავდასხმის კამპანია, რომელსაც შეეწირა ერთი მათგანის სიცოცხლე და მათი ნაწილი დღემდე საავადმყოფოში რჩება. ნაცვლად იმისა, რომ ხელისუფლებამ დასაჯოს ამ წარმოუდგენელი ძალადობის ორგანიზატორები, გამოაკრეს ზიზღის ობიექტებად ის ჟურნალისტები და მედიის წარმომადგენლები, რომლებსაც თავად დაესხნენ თავს. ეს არის წარმოუდგენელი ცინიზმი, უსამართლობა და ქვეყნის დანგრევა", - განაცხადა ხოშტარიამ.