დაავადებათა კონტროლის ეროვნული ცენტრის ხელმძღვანელმა ამირან გამყრელიძემ ვაქცინირებული პირების სახლში ყოფნის აუცილებლობაზე გააკეთა განმარტება და აღნიშნა, რომ დამსაქმებლები ვალდებულები არიან, ახლადაცრილი ადამიანის 1-2 დღით სახლში ყოფნა უზრუნველყონ. მისივე თქმით, ორჯერადად ვაქცინირებული პირისთვის გარკვეული შეღავათები დაწესდება:

„დამსაქმებლებმა უნდა უზრუნველყონ, რომ ახლად აცრილი ადამიანი 1 ან 2 დღით სახლში იმყოფებოდეს. მაგალითად ჩვენ, დაავადებათა კონტროლის ცენტრში, 2 გამოსასვლელ დღეს ვაძლევთ იმ ადამიანს, რომელიც აიცრება.

ჩვენთან დასაქმებულთა 61% აცრილია და აგვისტოს ბოლოსთვის გვინდა, რომ 80-85%-ზე ავიდეთ.

ეკატერინე ტიკარაძემ მოგახსენათ სხვადასხვა ლატარეის გათამაშებაზე და სხვა წამახალისებელ ღონისძიებებზე. ორჯერ აცრილთათვის გარკვეული შეღავათები უნდა იყოს - ისინი უფრო მარტივად მიიღებენ მონაწილეობას სხვადასხვა ღონისძიებებში. ამის სრული ჩამონათვალი გვაქვს, თუმცა ეს დამოკიდებულია დამსაქმებლებზე. ეს არის მხოლოდ რეკომენდაციები. დამსაქმებლებმა უნდა უზრუნველყონ, ამიტომ მათ ვთხოვთ, რომ მეტი წახალისება მისცენ აცრებს. მათ შეიძლება ბევრი რამ მოიფიქრონ ამასთან დაკავშირებით“, - განაცხადა ამირან გამყრელიძემ.