ოკუპირებული სამხრეთ ოსეთის ე.წ. სახელმწიფო უსაფრთხოების კომიტეტი დე ფაქტო რესპუბლიკაში ღორის აფრიკული ჭირის ეპიდემიის აფეთქებასთან ლუგარის ლაბორატორიის კავშირს არ გამორიცხავს. ამის შესახებ ინფორმაციას თავად ე.წ. უსაფრთხოების კომიტეტი ავრცელებს.

განცხადების მიხედვით, მიმდინარე წლის ივლისში ცხინვალის რეგიონის სასაზღვრო ზოლის ზოგიერთ სოფელში ოკუპირებული სამხრეთ ოსეთის რესპუბლიკის ე.წ. ვეტერინარული და ფიტოსანიტარული ზედამხედველობის სამსახურმა აფრიკული ჭირისგან ღორის სიკვდილის შემთხვევები აღწერა. განცხადებაში აღნიშნულია, რომ მსგავსი ვითარება დაფიქსირდა 2016, 2017 წლებშიც, როდესაც აფრიკული ჭირისგან 1000-ზე მეტი ღორი დაიღუპა და მნიშვნელოვანი ზიანი მიადგა სოფლის მეურნეობას.

„რუსეთის შეიარაღებული ძალების რადიაციული, ქიმიური და ბიოლოგიური დაცვის ჯარების ხელმძღვანელის იგორ კირილოვის თქმით, ღორის აფრიკული ცხელება 2007-2018 წლებში სამხრეთ ოსეთში, რუსეთში, ევროპის ქვეყნებსა და ჩინეთში საქართველოს ტერიტორიიდან გავრცელდა“, - აღნიშნულია რუსეთის მიერ ოკუპირებული სამხრეთ ოსეთის ე.წ. სახელმწიფო უსაფრთხოების კომიტეტის მიერ გავრცელებულ განცხადებაში. განცხადებაში გამოთქმულია მოსაზრება, რომ საქართველო განზრახ მალავს ღორის აფრიკული ჭირის თავის კონტროლირებად ტერიტორიაზე, დროებით სასაზღვრო სოფლებში გავრცელების ფაქტებს. ამასთან ერთად, ცხინვალის ე.წ. უშიშროების კომიტეტი დაავადების გავრცელების ლუგარის ლაბორატორიასთან კავშირზეც მიანიშნებს:

„სახელმწიფო უსაფრთხოების სამსახური არ გამორიცხავს, რომ სამხრეთ ოსეთში ღორის აფრიკული ჭირის ეპიდემიის აფეთქება დაკავშირებულია ე.წ. "ლუგარის სახელობის საზოგადოებრივი ჯანმრთელობის ცენტრის” მუშაობასთან, რომელიც ატარებს კვლევებს ჭირის, ბრუცელოზის, ჯილეხის, დენგეს ცხელების, ყირიმ-კონგოს ჰემორაგიული ცხელების ატიპური ფორმების სფეროში და იყენებს პათოგენებს, რომელთა საშუალებითაც თბილისის რეჟიმი ახორციელებს ბიოტერორისტულ აქტებს სამხრეთ ოსეთის წინააღმდეგ“, - აღნიშნულია განცხადებაში.

რუსეთის მიერ ოკუპირებულ სამხრეთ ოსეთში აფრიკული ჭირის შედეგად ღორის სიკვდილის შემთხვევები ფიქსირდება. შემთხვევების სიმრავლით რამდენიმე სოფელი გამოირჩევა, მათ შორის, ვანათი და სარაბუკი. „ეხო კავკაზას“ თანახმად, იმ სოფლებიდან, სადაც დაფიქსირებულია ინფექციის შემთხვევები, აკრძალულია არა მხოლოდ ცოცხალი ღორის, არამედ ყველა სახის ცხოველის, ხორცისა და რძის პროდუქტების ექსპორტი.

წყარო: რადიო თავისუფლება