პორტალ smo.ge-ს მიერ გავრცელებული ინფორმაციის შემდეგ, რომელსაც თან ერთვოდა ფოტო, “რესპუბლიკური პარტიის” სენაკის ორგანიზაციის თავმჯდომარე და, ამავე დროს, სენაკის რაიონის სოფელ ახალსოფელის რწმუნებული ბადრი ხურცია გარემოსდაცვითი ზედამხედველობის დეპარტამენტის სამეგრელო-ზემო სვანეთის მხარის სამსახურში დაიბარეს.

ადგილობრივი არასამთავრობო ორგანიზაციის წარმომადგენლები ბადრი ხურციას ბრაკონიერობაში ადანაშაულებდნენ.

ამის მიზეზად ის ფოტომასალა სახელდებოდა, რომელიც “რესპუბლიკური პარტიის” რაიონული ორგანიზაციის ლიდერმა სოციალურ ქსელში განათავსა. ხურცია ფოტოებზე გადაღებულია ნანადირებ ხოხბებთან ერთად, რომელიც ბრაკონიერობად ითვლება. გარემოსდაცვით ზედამხედველობის სამსახურში დაბარებულმა ხურციამ განაცხადა, რომ სოციალურ ქსელში დადებული ფოტოები 4 წლის წინ არის გადაღებული.

ამასთანავე ის აღნიშნავს, რომ ნანადირევი მას არ ეკუთვნის, მან უბრალოდ ნანადირევ ხოხბებთან ერთად რამდენიმე ფოტო გადაიღო. ჯერჯერობით სამეგრელო-ზემო სვანეთის მხარის გარემოსდაცვითი ზედამხედველობის სამსახური ხურციასთან დაკავშირებულ ისტორიებს სწავლობს, რომლის შემდეგაც გახდება ცნობილი, ნამდვილად არის თუ არა “რესპუბლიკური პარტიის” სენაკის რაიონული ორგანიზაციის ლიდერი ბრაკონიერი და რა სანქციები განხორციელდება მასზე სამომავლოდ.