ერთიანი ნაციონალური მოძრაობის წევრმა, ხატია დეკანოიძემ ევროპული საბჭოს პრეზიდენტისა და ოპოზიციის წევრების შეხვედრის დასრულების შემდეგ კომენტარი გააკეთა. მან აღნიშნა, რომ მიშელთან საუბრის თემა 5-6 ივლისის მოვლენები, შეთანხმების დარღვევა და საფრთხის ქვეშ მყოფი ევროატლანტიკური კურსი იყო.

ხატია დეკანოიძის თქმით, შეხვედრაზე მიშელმა აღნიშნა, რომ ოპოზიციასთან მისი ამგვარი ხანგრძლივი შეხვედრა უკვე სიგნალია ხელისუფლებისთვის და პრემიერმინისტრ ირაკლი ღარიბაშვილთან მნიშვნელოვანი საუბარი ექნება.

"რა თქმა უნდა, ის მძიმე მოვლენები, რომლებიც განვითარდა 5-6 ივლისს, შეეხებოდა, პირველ რიგში, პრემიერმინისტრის განცხადებას, როდესაც მან პირდაპირ თქვა, რომ ვერ დაიცავდა ადამიანებს, ამის შემდეგ კი ხელისუფლებამ არც სამართლებრივი და არც პოლიტიკური პასუხისმგებლობა არ აიღო, შეხვედრაზე შევეხეთ იმას, რომ ევროატლანტიკური ღირებულებები და სწრაფვა საქართველოში საკმაოდ სერიოზული დარტყმის ქვეშაა და პირდაპირ ვუთხარით, რომ ჩვენ ახლა გვაქვს დიდი რისკები - ან მიდივართ რუსეთში, ან ვრჩებით ევროატლანტიკურ კურსზე, ეს მას ძალიან კარგად ესმის, შეშფოთებულია ევროკავშირის დროშის დაწვის გამო, ეს ნამდვილად სამწუხაროა.

ვისაუბრეთ შეთანხმების დარღვევაზე, არ ვართ შეთანხმების მონაწილეეები, თუმცა ჩვენი არგუმენტი არის ის, რომ ამნისტიის შესახებ კანონპროექტს ჩვენ ვერ დავუჭერთ მხარს, რომელიც ქართულ ოცნებას ჯერ კიდევ არ გამოუტანია და პირიქით, დაარღვია ის დათქმები, რომლებიც ჩადებული იყო, დაარღვია დათქმები ცენტრალურ საარჩევნო კომისიაზე, წარმოადგინა კანდიდატები, რომლებიც კლანურია და ეს მე მიშელს ვუთხარი. ზოგადად, მან თქვა - ის, რომ ოპოზიციას ხვდება და საკმაოდ ხანგრძლივი შეხვედრა აქვთ, ეს უკვე გარკვეული გზავნილია ხელისუფლებისთვის და თქვა, რომ ამასთან დაკავშირებით ღარიბაშვილთან ექნება საკმაოდ მნიშნელოვანი საუბარი და გზავნილები, რომელსაც საქართველოს მოქალაქეები ელოდებიან", - თქვა ხატია დეკანოიძემ.