მათი ცნობით, კიევის აეროპორტის სასაზღვრო სამსახურის თანამშრომლებმა კაკულიას განუმარტეს, რომ მისი მონაცემები შესულია ე.წ. შავ სიაში, რომელიც ჩამოთვლილ პირებს ქვეყანაში ერთი წლის განმავლობაში შესვლას უკრძალავს. "შემიყვანეს დაკითხვის ოთახში, სადაც დაიწყეს საბუთების გაფორმება.

მათ განმიმარტეს, რომ უკრაინის უშიშროების სამსახურის გადაწყვეტილებით, მე ერთი წლის განმავლობაში აკრძალული მაქვს უკრაინაში შესვლა და ჟურნალისტური საქმიანობა. უშიშროების სამსახურმა საეჭვო პირთა სიაში შემიყვანა",`- განაცხადა დავით კაკულიამ.

"რუსთავი 2"-ის გადამღები ჯგუფი უკრაინის არასასურველი სტუმრების სიაში მოხვდა, თუმცა ამ სიის არსებობა ოფიციალურად არავის დაუდასტურებია. საუბარი იყო ინიციატივაზე, რომელიც უკრაინის პრეზიდენტის მოკავშირემ, რადას დეპუტატმა ოლეგ ცარიოვმა შეადგინა, სადაც სიაში შეყვანილი პირებისთვის ქვეყნაში შესვლის აკრძალვა მოითხოვა.

არასასურველი სტუმრების სიაში ასევე მოხვდნენ მიხეილ სააკაშვილი და ერთიანი ნაციონალური მოძრაობის ის წევრები, რომლებიც კიევში ევროინტეგრაციის მომხრეთა მხარდასაჭერად ჩავიდნენ. უკრაინაში მუშაობისას პრობლემები შეექმნა "ტაბულას"`გადამღებ ჯგუფსაც.

უკრაინის უშიშროების და საიმიგრაციო სამსახურის თანამშრომლებმა ქვეყნის დატოვება მოსთხოვეს დიმიტრი ავალიანსა და მის ოპერატორს. ჟურნალისტებს სიტყვიერად გააფრთხილეს და კიევის დასატოვებლად 24-საათიანი ვადა მისცეს.