საქართველოში აშშ-ის ელჩმა კელი დეგნანმა ლექსო ლაშქარავას გადაცვალების გამო მწუხარება გამოთქვა და განაცხადა, რომ სახელმწიფოს პასუხისმგებლობაა, უზრუნველყოს მშვიდობიანი გარემო, რათა არავისზე განხორციელდეს ძალადობა, მიეცეთ ადამიანებს მშვიდობიანი შეკრების საშუალება, ხოლო ჟურნალისტებს - უსაფრთხო მედია გარემოში მუშაობა შეეძლოთ. დეგნანის თქმით, 5-6 ივლისს ასეთი მშვიდობიანი გარემო ვერ დაინახა.

ელჩმა ასევე ღარიბაშვილის გადადგომის მოთხოვნასთან დაკავშირებით გააკეთა კომენტარი და აღნიშNა, რომ ქართველი ხალხის გადასაწყვეტია, ვინ სურს მას ლიდერად:

"რა თქმა უნდა, სახელმწიფოს პასუხისმგებლობაა უზრუნველყოს მშვიდობიანი გარემო ადამიანებისთვის, იმისთვის რომ მათ გამოხატონ კონსტიტუციური უფლებები, მათ შორის შეკრების და გამოხატვის თავისუფლება, ასევე, ჟურნალისტური საქმიანობის განხორციელების უფლება. სამწუხაროდ, 5 და 6 ივლისს ეს ვერ დავინახეთ, თუმცა იმედი მაქვს მომავალში იქნება მეტი დაფასება, თუ რამდენად მნიშვნელოვანი და ღირებულია ეს თავისუფლებები და უფლებები.

ქართველი ხალხის გადასაწყვეტია, ვინ სურს მას ლიდერად, ქვეყნის ხელმძღვანელად მნიშვნელოვანია, რომ ყველაფერი დემოკრატიული პროცესის ფარგლებში წარიმართოს", - განაცხადა დეგნანმა.