დამოუკიდებელი ექსპერტი ალექსანდრე გეჯაძე გარდაცვლილი ოპერატორის ლექსო ლაშქარავას ცხედრის კვლევაში ჩასართავად გამომძიებლის ნებართვას ელოდება.

ექსპერტის განმარტებით, ის მისული იყო სამხარაულის ექსპერტიზის ბიუროში, თუმცა კვლევები გადაიდო - მისი ჩართვისთვის გამომძიებლის ნებართვა სამხარაულის ბიუროს არ მიუღია.

„მე გამოვცხადდი სამხარაულის დაწესებულებაში, რომ დაგვეწყო კვლევის შესწავლის პროცესი. გადაიდო, რამე თუ, გამომძიებლის ნებართვა სამხარაულს არ ჰქონდა მიღებული. დამირეკა სამხარაულის ექსპერტმა და მითხრა, რომ ელოდება გამომძიებლისგან წერილს ჩემი ჩართულობის თაობაზე. როგორც კი დამირეკავს მათი წარმომადგენელი, ჩავალ და დავიწყებთ კვლევის პროცესს", - თქვა მან.

ექსპერტის თქმით, ლექსო ლაშქარავას გარდაცვალების ზუსტი მიზეზის დასადგენად ჩატარდება როგორც სამედიცინო ისტორიის, ისე ოპერატორის შინაგანი ორაგნოების კვლევა.

„შევისწავლი სამედიცინო დოკუმენტაციას - რა დაზიანება ჰქონდა,რა კვლევა ჩაუტარდა, რა დიაგნოზი დაუსვეს. ვნახავთ რა ცვლილებები აქვს, მოხდება შედარებითი ანალიზი და ეს შემდგომი ქმედებების საკითხია. აღებული იქნება შინაგანი ორგანოების ნაჭრები ჰისტოლოგიურ კვლევაზე. ამ ეტაპზე ექსპერტიზა დაადგენს სიკვდილის მიზეზს", - ამბობს გეჯაძე ფორმულასთან საუბრისას.

შეგახსენებთ, ტვ პირველის ოპერატორი, ლექსო ლაშქარავა, რომელიც 5 ივლისს სიძულვილის ჯგუფების მიერ სირცხვილიას ოფისის დარბევისას მათგან ძალადობის მსხვერპლი გახდა, გარდაიცვალა.

შსს-მ ლექსო ლაშქარავას გარდაცვალების საქმეზე გამოძიება თვითმკვლელობამდე მიყვანის მუხლით დაიწყო.