თბილისის მუნიციპალიტეტებმა კუბოების ტენდერი გამოაცხადეს. წლების განმავლობაში არსებული ეს ტრადიცია წელსაც ძალაშია: ამ გზით შეძენილ კუბოებს მუნიციპალიტეტები იმ ოჯახებს გადასცემენ, რომლებიც უმწეო და გაჭირვებულები არიან და რომელთა წევრიც, მომავალ წელს, შესაძლოა გარდაიცვალოს.

ტენდერი უკვე გამოაცხადა გლდანის მუნიციპალიტეტმა. ვებ-გვერდზე, სადაც განცხადებაა გამოქვეყნებული, შესასყიდი ობიექტის ნუსხაში მითითებულია:

“კუბო (ჩასასვენებელი) ტრადიციული, წიფელის, სტანდარტული ზომის, გამოკრული სარჩულით, სუდარით”.

„ნიუპოსტმა“ უშუალოდ მუნიციპალიტეტის ხელმძღვანელთან და საფინანსო-ეკონომიკური განყოფილების უფროსთან საუბარში გაარკვია, რომ ერთი ცალი კუბოს შესასყიდი ზედა ზღვარი 250 ლარია, შემდეგ ვაჭრობა ცხადდება და პრიორიტეტი მიენიჭება იმას, ვის მიერ შემოთავაზებული ფასი და პირობები უფრო ხელსაყრელი აღმოჩნდება:

„განცხადებაში 70 ჩასასვენებელია მითითებული, იმის გათვალისწინებით, რომ წელს 100-ზე მეტი დაგვჭირდა. პრიორიტეტს ვანიჭებთ იმას, რომ საქონელი მოთხოვნისთანავე იყოს მოწოდებული, ხელშეკრულების მოქმედების ვადა 2014 წლის 31 დეკემბრამდეა, რათა საჭიროების შემთხვევაში, შემაფერხებელი გარემოება არ აღმოჩნდეს ის, რომ ხელშეკრულება არ არსებობს“, - განაცხადა „ნიუპოსტთან“ საუბარში გლდანის მუნიციპალიტეტის საფინანსო-ეკონომიკური სამსახურის უფროსმა ალექსანდრე ბეშიძემ.

მისივე თქმით, კუბოების შეძენა საბითუმო წესით არ ხდება და მისი მიწოდება წლის განმავლობაში, განცხადების შემოსვლის შემდეგ მოხდება:

„ღმერთმა ყველა ჯანმრთელად ამყოფოს, მაგრამ თუ უფრო მეტი გახდება საჭირო, ეს ფორმალობა მაშინვე მოგვარდება - განცხადებაში მითითებული სავარაუდო რაოდენობა, ცხადია, ზუსტი ვერ იქნება. ხოლო თუ ისე მოხდა, რომ ნაკლები ჩასასვენებელი გახდა საჭირო, რასაკვირველია, ნაკლები თანხა დაიხარჯება“, - თქვა ბეშიძემ.

მისივე თქმით, მსგავსი ტენდერი არამარტო გლდანის, თბილისის სხვა მუნიციპალიტეტებშიცაა გამოცხადებული.

გლდანის მუნიციპალიტეტის სატენდერო განაცხადში 70 კუბოს შეძენის სავარაუდო თანხად 17.500 ლარია მითითებული.