ბიუროს დღევანდელ სხდომაზე სიტყვირი დაპირისპირება მოხდა. ენმ-ს წევრმა ხატია დეკანოიძემ მოსამართლეებისა და ცესკო-ს თავმჯდომარეობის კანდდატების შერჩევის პროცესის შეჩერება მოითხოვა. მისი განმარტებით, ეს ორი საკითხი პროცესების მაღალ ტემპერატურაზე აყვანას გამოიწვევს:

"კიდევ ერთხელ მინდა, მოგიწოდოთ, მათ შორის, ჩვენი საერთაშორისო პარტნიორების პოზიცია. იცით, არ შემოიტანოთ სხდომაზე კენჭისყრაზე მოსამართლეობის კანდიდატურები, რომლებიც განხილვაზე წარმოდგენილი იყო და ჩვენ არ ვმონაწილეობდით. მეორე - აქედანვე მინდა, მოვუწოდო ყველას, მათ შორის, უმრავლესობას, კიდევ ერთხელ კარგად გაიაზროს, რას ნიშნავს ცესკო-ს ის 2 კანდიდატურა, რომელსაც ასევე სამოქალაქო საზოგადოება არ აფასებს ისე, როგორც უნდა შეფასდეს. ისინი არ არიან დამოუკიდებელი კანდიდატები, ამიტომ ჩვენი პოზიციაა 2 საკითხი, რომელიც ეხება მოსამართლეების დანიშვნის შეჩერება და ცესკო-ს თავმდჯომარეობაზე ამ 2 ადამიანის წარდგენა. ეს იქნება ის, რაც გამოიწვევს პროცესების მაღალ ტემპერატურაზე აყვანას", - მიმართა დეკანოიძემ მმართველ პარტიას.

დეკანოიძეს პარლამენტის თავმჯდომარის მოადგილემ არჩილ თალაკვაძემ უპასუხა და უთხრა, რომ ნაციონალური მოძრაობის მმართველობის დროს მოსამართლეების დანიშნვა კონკურსის გარეშე ხდებოდა. მან ოპონენტები არადემოკრატიული პროცესების მართვაში დაადანაშაულა:

"სიმართლე გახლავთ ის რომ მოსამართლეების დანიშვნა და დამტკიცება მაშინ როცა თქვენ პასუხისმგებლობაში იყო, ხდებოდა ყოველგვარი კონკურსის გარეშე ხდებოდა, შერჩევის, გასაუბრების, ჩართულობის გარეშე, წარდგენით და მდუმარე დამტკიცების პროცედურით, რომელიც ეთანხმებით ალბათ რომ არ იყო დემოკრატიული, თქვენ არადემოკრატიულად აკეთებდით ამას. თქვენ რომ სასამართლოზე იყავით პასუხისმგებელი, იმ სასამართლოში 100-დან 99 მოქალაქე ყოველთვის იყო მტყუანი, ანუ სახელმწიფო მოქალაქეებს ეუბნებოდა თქვენ არასოდეს არ ხართ მართალიო", - მიმართა თალაკვაძემ დეკანოიძეს, რაზეც ოპოზიციის ლიდერმა განუცხადა, რომ ოცნების დეპუტატმა კლასიკური დემაგოგია აჩვენა:

"რა დემაგოგიაა, დემაგოგიის კლასიკა გვაჩვენეთ წეღან" - უთხრა დეკანოიძემ თალაკვაძეს.