გორის გაზგასამართსადგურზე მომხდარი ხანძრის დროს დაშავებული პირებიდან ერთ-ერთის მდგომარეობა მძიმეა.

დამწვრობის ცენტრის ხელმძღვანელის გუგა ქაშიბაძის ინფორმაციით, 49 წლის მამაკაცს სხეულის 55% აქვს დამწვარი, ასევე დაზიანებულია სასუნთქი გზები და მიღებული აქვს დამწვრობითი შოკი. ქაშიბაძის თქმით, მდგომარეობა სტაბილურია:

"პაციენტი შემოვიდა დღეს დილით, გამთენიისას 49 წლის კაცი, 55% სხეიულის თერმული დამწვრობა. სავარაუდოდ, ალით აქვს მიღებული დამწვრობა, ამას ემატება სასუნთქი გზების დაზიანება, დამწვრობითი შოკი. მუხედავად საკმაოდ სერიოზული ტრავმისა, ამ დროისთვის მისი მდგომარეობა არის სტაბილური", - განაცხადა გუგა ქაშიბაძემ.

შეგახსენებთ, გორში შინდისის გზატკეცილზე მდებარე გაზგასამართ სადგურზე ცეცხლი მაშინ გაჩნდა, როცა თხევად აირს ავტოცისტერნაში ასხამდნენ.

შემთხვევის შედეგად სულ 3 ადამიანია დაშავებული.