"სოციალური სამართლიანობის ცენტრი" მალხაზ მაჩალიკაშვილის დაკავებასთან დაკავშირებით განცხადებას ავრცელებს, სადაც წერს, რომ შსს-ს ამ დრომდე არ მიუწოდებია ინფორმაცია, რის საფუძველზე მოხდა მისი აყვანა. როგორც ორგანიზაციის ინფორმაციაშია ნათქვამი, მოძალადეები მაჩალიკაშვილის მისამართით იგინებოდნენ და ფიზიკური ანგარიშსწორების მიზნით ჯებირების გარღვევას ცდილობდნენ, პოლიციამ კი მისი ტერიტორიიდან გაყვანა სცადა. ამის შემდეგ მოხდა მაჩალიკაშვილის დაკავება, მისი ადგილსამყოფელი კი ამ დრომდე უცნობია:

"დღეს დილიდან სახალხო დამცველის აპარატის დახმარებით გავიგეთ, რომ მალხაზ მაჩალიკაშვილი თბილისის N2 დროებითი დაკავების იზოლატორში იმყოფებოდა. ჩვენი ადვოკატები დაუყოვნებლივ შეხვდნენ ბატონ მალხაზ მაჩალიკაშვილს იზოლატორში. შეხვედრისას ბატონმა მალხაზ მაჩალიკაშვილმა განმარტა, რომ, რამდენად მისთვის ცნობილია, ის ადმინისტრაციულ სამართალდარღვევათა კოდექსის წვრილმანი ხულიგნობისა და პოლიციის მოთხოვნისადმი დაუმორჩილებლობის საფუძვლით არის დაკავებული. მაჩალიკაშვილის თქმით, გუშინ ღამით იგეგმებოდა მისი ხელწერილით გათავისუფლება, თუმცა პოლიციამ ეს დაპირება მოგვიანებით რატომღაც შეცვალა.

მალხაზ მაჩალიკაშვილის თქმით, ის იმყოფებოდა ჩიტაძის ქუჩის ჩამოსასვლელთან, პოლიციის მიერ აღმართულ ჯებირებს მიღმა, აქციის ტერიტორიაზე. მას შემდეგ, რაც რკინის ჯებირების მეორე მხარეს მყოფმა ძალადობრივი დაჯგუფების წევრებმა მისი იდენტიფიცირება მოახდინეს, დაიწყეს სიტყვიერი შეურაცხყოფა, გინება და ცდილობდნენ ჯებირების გარღვევას მის მიმართ ფიზიკური ანგარიშსწორების მიზნით. როგორც მაჩალიკაშვილმა აღნიშნა, ამ დროს მასთან გამოჩნდა პოლიცია და იფიქრა, რომ სამართალდამცავები საფრთხის შემცველი გარემოდან განრიდებას ცდილობდნენ. ამ პირობებში ცხადია, მას არანაირი წინააღმდეგობას პოლიციისთვის არ გაუწევია. მხოლოდ მოგვიანებით მან აღმოაჩინა, რომ პოლიციამ ის დაუსაბუთებლად დააკავა", - წერია განცხადებაში.