გუშინ რამდენიმესაათიანი ძებნის შემდეგ, მტკვარში ახალგაზრდა მამაკაცის ცხედარი იპოვნეს.

36 წლის მამაკაცი, რომელმაც პატარა გოგონას გადასარჩენად საკუთარი სიცოცხლე გაწირა, შოთა ქარსელაძეა. მან ცურვა არ იცოდა, თუმცა მტკვარში გადავარდნილი გოგონას გამოსაყვანად, გარისკა და მდინარეში გადახტა.

შოთამ მისი გადარჩენა შეძლო, თავად კი ნაპირზე ვეღარ გამოვიდა - შემთხვევა ორთაჭალაში მოხდა.

„ამ ქვეყანაში ყველაფერი გაუფასურებულია, მათ შორის ადამიანური გმირობაც. დღეს ამ ბიჭმა, შოთა ქარსელაძემ, მტკვარში გადავარდნილი პატარა გოგო გადაარჩინა სიკვდილს, თვითონ კი დაიღუპა. ამ ამბავში კი მთავარი კიდევ ისიცაა, რომ შოთამ ცურვა არ იცოდა, ანუ როცა წყალში შედიოდა ესმოდა რომ სიცოცხლეს რისკავდა. წერაც კი მიჭირს! ღმერთმა გაანათლოს მისი სული, ქედს ვიხრი და ვუთანაგრძნობ მის ყველა ახლობელს, პირველ რიგში კი მშობლებს, რომლებმაც ასეთი ადამიანი გაზარდეს!“ - წერს ირაკლი მელაშვილი ფეისბუქის გვერდზე.