"შაბათის მთავარში" გასული რეპორტაჟის შემდეგ, "მთავარ არხს" ის დევნილები დაუკავშირდნენ, რომლებიც სახელმწიფოს მხრიდან კორუფციული გარიგების მსხვერპლი აღმოჩნდნენ. საქმე ეხება დევნილთა სამინისტროს მიერ იძულებით გადაადგილებისთვის ჯერ შესყიდულ, შემდეგ კი ყადაღა დადებულ ბინებს, რომლებიც საბოლოოდ ე.წ. კლანის წევრი მოსამართლეების საკუთრებაში აღმოჩნდა. სქემას კი ყოფილი მინისტრი სოზარ სუბარი და თეა წულუკიანი ლობირებდნენ.

დევნილები ამბობენ, "მთავარი არხის" სიუჟეტში, მათი ბინები ჩანდა და მოსამართლეებს სწორედ ეს ბინები გადასცეს.

"2019 წელს 19 ოქტომბერს დაგვიძახეს, პროფკავშირები რომ არის იქ დაგვირიგეს ყველას ბინა. 2-ოთახიანი მოგცეს ჩვენ. გააერთიანეს 3 ოჯახი გრაფაში გაუშვეს და უარი ვთქვით, უკან დააბრუნეს ეს ბინა, იმის მერე სასამართლოში შევიტანე.

სიუჟეტი ვნახე და ზუსტად იმ კორპუსში იყო ჩვენი ბინა, სადაც სიუჟეტი გაკეთდა გუშინ.

ზუსტად ჩვენი ბინები მისცეს მოსამართლეებს, მე-12-ზე, მე-10 სულ ყველა დაურიგა მოსამართლეებს",-თქვა ერთ-ერთმა დევნილმა.

კორპუსს, რომელშიც დევნილთა სამინისტრომ იძულებით გადაადგილებული პირებისთვის ბინები შეიძინა, ისევ სახელმწიფოს მოთხოვნით ყადაღა დაადეს, ხელშეკრულება გაწყვიტეს, იძულებით გადაადგილებული პირებისთვის განკუთვნილი უძრავი ქონება კი მოსამართლეების ხელში აღმოჩნდა.

წყარო: მთავარი არხი