პარლამენტში უზენაესი სასამართლოს მოსამართლეობის კანდიდატებს 6 ივლისიდან მოუსმენენ.

გადაწყვეტილება იურიდიულ საკითხთა კომიტეტზე მიიღეს. როგორც კომიტეტის თავმჯდომარემ, ანრი ოხანაშვილმა განაცხადა, გასაუბრებები სამშაბათს, დილის 10 საათიდან დაიწყება.

"სამუშაო ჯგუფმა დაასრულა მუშაობა და მიიჩნია, რომ წარმოდგენილი დოკუმენტაცია სრულად თავსებადია კანონმდებლობით დადგენილ მოთხოვნებთან", - თქვა ოხანაშვილმა.

მისი თქმით, მიუხედავად იმისა, რომ ოპოზიცია უარს აცხადებს პროცესში მონაწილეობაზე, დროს მაინც გამოუყოფენ გასაუბრებებისთვის. შესაბამისად, ქართულ ოცნებას თითოეულ კანდიდატთან ინტერვიუსთვის ექნება 75 წუთი, ნაციონალურ მოძრაობას 32 წუთი, ფრაქციებს შარლ მიშელის ჯგუფსა და ლელოს, ასევე, მოქალაქეებს, გირჩსა და ევროპელ სოციალისტებს 15-15 წუთი. უფრაქციო ჯგუფებისთვის კი, თითოეულისთვის გამოიყოფა 3 წუთი, ანუ 11 წევრისთვის ჯამში 33 წუთი.

ოხანაშვილის განცხადებით, სახალხო დამცველის მიერ პროცესში მონაწილეობაზე უარის თქმის მიუხედავად, დრო გამოიყოფა მისთვისაც. მან აღნიშნა ისიც, რომ პროცესში მონაწილეობის სურვილი გამოთქვა არასამთავრობო ორგანიზაციის ნაწილმა, მათ შორის, სოციალური სამართლიანობის ცენტრმა (ყოფილი EMC) და საქართველოს ახალგაზრდა იურისტთა ასოციაციამ. დეპუტატის თქმით, დღეში 2 კანდიდატს მოუსმენენ და რიგითობა ანბანური თანმიმდევრობით იქნება.