პროკურატურის ინფორმაციით, წალკაში ტვ პირველის გადამღებ ჯგუფზე თავდასხმისთვის დაკავებულ გოჩა აფრასიძეს ბრალი წარედგინა. გამოძიება აფრასიძეს ჟურნალისტის პროფესიულ საქმიანობაში უკანონდ ხელის შეშლის ფაქტს ედავება. უწყების ცნობით, ბრალდებულს სასჯელის სახედ ფულადი ჯარიმა ან 2 წლამდე თავისუფლების აღკვეთა ემუქრება:

"საქართველოს პროკურატურამ, წალკის მუნიციპალიტეტში მომხდარი ჟურნალისტისთვის ძალადობის მუქარით პროფესიულ საქმიანობაში უკანონოდ ხელის შეშლის ფაქტზე, გ.ა-ს ბრალდება წარუდგინა.

საქართველოს შინაგან საქმეთა სამინისტროს მიერ ჩატარებული გამოძიებით დადგინდა, რომ გ.ა-მ 2021 წლის 30 ივნისს, ტელეკომპანია „TV პირველი“-ს რეპორტიორსა და ოპერატორს ძალადობის მუქარით უკანონოდ შეუშალა ხელი პროფესიული საქმიანობის განხორციელებაში.

სამართალდამცავებმა გ.ა. 2021 წლის 30 ივნისს დააკავეს. მას ბრალდება საქართველოს სისხლის სამართლის კოდექსის 154-ე მუხლის მე-2 ნაწილით (ძალადობის მუქარით, ჟურნალისტისთვის პროფესიულ საქმიანობაში უკანონოდ ხელის შეშლა) წარედგინა, რაც სასჯელის სახედ და ზომად ჯარიმას ან 2 წლამდე თავისუფლების აღკვეთას ითვალისწინებს.

ბრალდების მხარე ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს კანონით დადგენილ ვადაში მიმართავს" - წერია უწყების განცხადებაში.