ამის შესახებ ყანდიაშვილი "სარკესთან" ინტერვიუში საუბრობს. "მედიის კონტროლი შემომთავაზა, რაზეც უარი ვუთხარი და ამით დამთავრდა ჩვენი ურთიერთობა. ამის შემდეგ ყველა ტელევიზიას და მედიასაშუალებას აკრძალული ჰქონდა ჩემთან ნებისმიერი სახის ურთიერთობა. მხოლოდ თანამშრომლობა კი არა, ინტერვიუს დონეზეც დაბლოკილი ვიყავი, პრესის ზოგიერთი გამოცემის გარდა", - აცხადებს ყანდიაშვილი საგაზეთო ინტერვიუში.

მისივე თქმით, ქართულ ჟურნალისტიკას დიდი მომავალი აქვს. ყანდიაშვილი აცხადებს, რომ ჟურნალისტიკა ხელოვნურად იკვებებოდა, ახლა კი დამფინანასებელი აღარ ჰყავს და შედეგად, მედიის გადაწყობა მოხდება. მისივე თქმით, ქართული ჟურნალისტიკის ძირითადი ნაწილი „გოიმურია“.

„ჩვენთან ჟურნალისტიკის ძირითადი ნაწილი გოიმურია. სრულ სიქაჯეში ვართ! არ მინდა გამოვიდეს, რომ შეურაცხყოფას ვაყენებ ყველა ჟურნალისტს და არც ყველას ვგულისხმობ, მაგრამ ბევრი, ვისაც ჟურნალისტი ჰქვია, არ არის ჟურნალისტი.

ისევე როგორც ბევრს ჰქვია პოლიტიკოსი თუ ექიმი და არ არიან ნორმალური პოლიტიკოსები თუ ექიმები. ქართულ ჟურნალისტიკას დიდი მომავალი აქვს. აქამდე ჟურნალისტიკა ხელოვნურად იკვებებოდა, რომელიც ორიენტირებული იყო არა ბაზარზე, არამედ დამფინანსებლის კეთილგანწყობაზე.

დღეს აღარ ჰყავს დამფინანსებელი – მთავრობა თუ ბიზნესმენები და მედია მთლიანად გადაეწყობა, გახდება ბაზარზე ორიენტირებული, სადაც ცუდი გაიცხრილება, ვეღარც ტყუილზე ორიენტირებული იქნება“, - აღნიშნავს ყანდიაშვილი.