რამდენიმე წუთში საქალაქო სასამართლოში უგულავას პროცესი უნდა განახლდეს. საქმე ეხება აეროპორტის ინციდენტს, სადაც უგულავაზე თავდამსხმელს დაზარალებულის სტატუსი მიენიჭა, ბრალი კი ხელისუფლების ოპონენტს წარედგინა.

წინა პროცესზე დაზარალებულის სტატუსის მქონე ძიუდოისტი გავაშელიშვილი უნდა დაკითხულიყო, თუმცა ის თბილისში არყოფნის გამო სხდომაზე ვერ გამოცხადდა, ამიტომ პროცესი დღეისთვის გადაიდო.

ადგილზე ისევ არ გამოცხადებულა გავაშელიშვილი, უგულავა კი აცხადებს, რომ მის ნაცვლად ექსპერტები მოჰყავთ დასაკითხად. უგულავას თქმით, სანამ ივანიშვილი მართავს ქვეყანას, სამართლიანი სასამართლო არ იქნება:

"ეს აბსურდის თეატრი, რომელსაც რატომღაც სასამართლო ჰქვია, გრძელდება. მე არ ვიცი, მალავენ მზეთუნახავივით ბადრი-საბა გავაშელიშვილს. წინაზე სკაიპით უნდოდათ დაეკითხათ და რაღაც ბუჩქებიდან ჩართეს. ახლა წინასწარ არ გვეუბნებიან, ამბობენ, რომ ვიღაც ექსპერტებს მოვიყვანთო. რისი ექსპერტები მოჰყავთ, ისიც არ ვიცით. მოკლედ, ეს სიგიჟე გრძელდება და ნუ შევიქმნით ილუზიას, რომ ამ ქვეყანაში სანამ ივანიშვილი მართავს სადღაც აბასთუმნის ტყეებიდან, რაიმე შეიცვლება სასამართლოში", - განაცხადა უგულავამ.