ტვ პირველის გადამღებ ჯგუფზე განხორციელებულ თავდასხმასზე მესამე სექტორი პასუხისმგებლობას ხელისუფლებას აკისრებს და აცხადებს, რომ სწორედ ოცნების დამსახურებაა წახალისებული ძალადობა, რომელმაც ბოლო პერიოდში ხშირი ხასიათი მიიღო.

"მედიის განვითარების ფონდის" ხელმძღვანელის თამარ კინწურაშვილის თქმით, ჟურნალისტების უსაფრთხოების საკითხი ძალიან პრობლემური გახდა და თუ მოძალადეები სათანადოდ არ დაისჯებიან, მომავალში მსგავსი ძალადობის ფაქტები კიდევ უფრო მოხშირდება:

"ძალიან პრობლემური გახდა ჟურნალისტთა უსაფრთხოება და მათი პროფესიული მოვალეობის შესრულება, რასაც გარკვეულწილად ასაზრდოებს ის მტრული რიტორიკა, რომელიც ხელისუფლების მიერ არაკონტროლირებადი მედიის წინააღმდეგ ისმის. თუ ასეთი პირების სათანადოდ დასჯა არ მოხდა, ეს იქნება მწვანე შუქი, რომ მომავალში ისევ მოხდეს მსგავსი ძალადობის ფაქტები"- აცხადებს კინწურაშვილი.

,,სოციალური სამართლიანობის ცენტრის" წარმომადგენელმა გურამ იმნაძემ განაცხადა, რომ სასამართლომ აუცილებლად უნდა მიიღოს ის გადაწყვეტილება, რაც საზოგადოებაში გააჩენს განცდას, რომ ასეთი სახის დანაშაული დაუსჯელი არ დარჩება:

"ჟურნალისტების უსაფრთხოება, დაცულობის განცდა, აუცილებლად აღსადგენია. ამ პრინციპებიდან გამომდინარე, აუცილებელია სასამართლომ მიიღოს ის გადაწყვეტილებები, რაც საზოგადოებაში გააჩენს განცდას, რომ მსგავსი ქმედებები სახელმწიფოს მხრიდან არ არის შეწყნარებული და მსგავსი ქმედებები დაუსჯელი არ რჩება"- განაცხადა იმნაძემ.

"საიას" თავმჯდომარის, ნიკა სიმონიშვილის თქმით, ყველა მსგავს ძალადობაზე პასუხისმგებლობა შსს-ს ეკისრბა, რადგან წუყებამ ასეთი ტიპის წინა შემთხვევებზე არადროული ქმედებებით ძალადობა წაახალისა:

"ეს გამოძახილია იმ ყველაფრისა, რასაც შინაგან საქმეთა სამინისტრო აქამდე აკეთებდა. იმ არადროული ქმედებების გათვალისწინებით, რასაც ჩვენ ვხედავდით წინა ძალადობასთან მიმართებითაც კიდევ ერთხელ მოვუწოდებთ ხელისუფლებას, დროული ნაბიჯები გადადგას ყველა ამ საქმესთან დაკავშირებით"- განაცხადა სიმონიშვილმა.