NGO-ბი ჟვანიას გადადგომას ეხმაურებიან - "ახალი თავმჯდომარის შერჩევა უნდა მოხდეს საპარლამენტო პარტიებს შორის კონსენსუსის საფუძველზე, ღიად და გამჭვირვალედ, რადგან ცესკოს მიმართ ნდობაზეა დამოკიდებული მომავალი არჩევნების შედეგების ლეგიტიმაცია“

პოლიტიკა - 19:49, 30 Jun, 2021

905

თამარ ჯვანიას თანამდებობიდან წასვლას ეხმაურებიან არჩევნებზე მომუშავე არასამთავრობო ორგანიზაციები. მესამე საქტორში მიიჩნევენ რომ ცესკო-ს თავმჯდომარის მიერ პოსტის დატოვებამ შესაძლოა, მომავალი თვითმმართველობსი არჩევნებისთვის საზოგადოებაში საარჩევნო ადამინისტრაციისა და სააარჩევნო პროცესების მიმართ ნდობა გაზარდოს.

ამასთან ერთად, არასამთავრობოები მიიჩნევენ, რომ თავმჯდომარის პოსტზე უნდა მოხდეს გამოცდილი და მიუკერძოებელი კანდიდატის შერჩევა, რომლის შერჩევის პროცესშიც აქტიურად უნდა იყოს ჩართული ყველა საპარლამენტო პოლიტიკური პარტია.

„დღეს საზოგადოებისთვის ცნობილი გახდა, რომ თამარ ჟვანიამ საკუთარი განცხადების საფუძველზე საქართველოს ცენტრალური საარჩევნო კომისიის (ცესკო) თავმჯდომარის თანამდებობის დატოვა. მიგვაჩნია, რომ აღნიშნულმა გადაწყვეტილებამ შეიძლება მნიშვნელოვნად შეუწყოს ხელი 2021 ადგილობრივი თვითმმართველობის არჩევნებისთვის საარჩევნო ადმინისტრაციისა და საარჩევნო პროცესების მიმართ ნდობის ამაღლებას.

2020 წლის საპარლამენტო არჩევნებზე საარჩევნო კომისიებში მმართველი პარტიის დომინირებამ, კენჭისყრის შედეგების შეჯამების დროს შემაჯამებელ ოქმებში დაფიქსირებულმა დისბალანსებმა და მათზე რეაგირების ნაკლოვანმა პრაქტიკამ, აგრეთვე, საარჩევნო დავების არასათანადოდ განხილვამ მნიშვნელოვნად შეამცირა საარჩევნო პროცესის მიმართ ნდობა. სწორედ აღიშნულმა განაპირობა საარჩევნო რეფორმის ფარგლებში საარჩევნო ადმინისტრაციის დაკომპლექტების წესის ცვლილების საჭიროება, რაც ცესკოს წევრების მაღალი ლეგიტიმაციის საფუძველზე შერჩევას გულისხმობს.

ამ ფონზე აუცილებელია ცესკოს ახალი თავმჯდომარისა და სხვა პროფესიული წევრების ვაკანტურ პოზიციებზე ისეთი კანდიდატების შერჩევა, რომლებიც გაზრდიან საარჩევნო ადმინისტრაციის მიმართ ნდობას, რითაც საარჩევნო რეფორმის ეფექტურ იმპლემენტაციას შეეწყობა ხელი. ამასთან, მნიშვნელოვნად მიგვაჩნია, რომ აღნიშნულ თანამდებობაზე მაღალკვალიფიციური, გამოცდილი და მიუკერძოებელი კანდიდატურების შერჩევა საპარლამენტო პოლიტიკურ პარტიებს შორის მაქსიმალური კონსესუსის საფუძველზე მოხდეს.

აუცილებელია, რომ განსაკუთრებით ცესკოს თავმჯდომარის არჩევის პროცესი წარიმართოს კანონით დადგენილი წესის შესაბამისად, მაქსიმალურად ღიად და გამჭირვალედ. მომავალი არჩევნების შედეგების ლეგიტიმურობა სწორედ საარჩევნო კომისიების მიერ გაწეული სამუშაოს მიმართ არსებულ საზოგადოებრივ ნდობაზე იქნება დამოკიდებული. ამ გზით ქვეყანა თავიდან აიცილებს ისეთ პოლიტიკურ კრიზისს, როგორიც 2020 წლის საპარლამენტო არჩევნების შემდეგ განვითარდა“ - ნათქვამია მესამე სექტორის განცხადებაში, რომელსაც ხელს აწერენ:

სამართლიანი არჩევნებისა და დემოკრატიის საერთაშორისო საზოგადოება (ISFED)

ახალგაზრდა იურისტთა ასოციაცია (GYLA)

საერთაშორისო გამჭვირვალობა საქართველო (TI)

ღია საზოგადოების ფონდი

ჟვანიას გადადგომამ შესაძალოა ხელი შეუწყოს ცესკოს მიმართ ნდობის ამაღლებას