საარჩევნო კოდექსში შეტანილ ცვლილებებს ოპოზიციიდან მხოლოდ "ნაციონალურმა მოძრაობამ" და "ლელომ" არ დაუჭირა მხარი. ხელისუფლების ოპონენტები კოდექსში არსებულ პრობლემურ მუხლებზე საუბრობენ, რომელიც ოცნებამ "შავ ხვრელად" გამოიყენა, რათა არჩევნების გაყალბება ისევ შესაძლებელი იყოს.

"ლელოს" ლიდერი მამუკა ხაზარაძე იმ მიზეზებზე საუბრობს, რის გამოც ცვლილებებს მხარი არ დაუჭირა. მისი თქმით, მიუღებელია თითმმართველობის არჩევნებში 40%-ანი ბარიერი. ის ასევე აცხადებს, რომ დაუშვებელია ისეთი მცირე პარტიების დასჯა, როგორიც ლეიბორისტული პარტიაა:

"უცბად 40%-იანი მაჟორიტარების თემის შემოვარდნა ამ კოდექსში, რომელიც არ განხილულა ინტენსიურად და ბოლო დღეს იქნა ჩაწერილი. ასევე, ჩვენთვის მიუღებელია იმ პატარა პარტიების დასჯა, რომელიც „ქართულმა ოცნებამ“ გადაწყვიტა. წარმოუდგენელია, რომ მამუკა ხაზარაძე „ლეიბორისტული პარტიის“ ინტერესებს იცავს, მაგრამ ასეა, სამართლიანობა სამართლიანობაა და არ აქვს მნიშვნელობა ჩვენ პოლიტიკურ შეხედულებებს, - აცხადებს ხაზარაძე.