თბილისის საქალაქო სასამართლოში გიგი უგულავას პროცესი, რომელიც დღეს უნდა გამართულიყო, 2 ივლისისთვის გადაიდო. მიზეზი გავაშელიშვილის გამოუცხადებლობაა, რომელიც დღევანდელ პროცესზე უნდა დაკითხულიყო. გამოძებამ მას საქმეში დაზარალებულის სტატუსი მიანიჭა.

დღევანდელ პროცესზე უგულავა სპეციალურად მივიდა, რათა გავაშელიშვილისთვის თვალებში ჩაეხედა, თუმცა პროკურატურამ განაცხადა, რომ ის დასავლეთ საქართველოში იმყოფება, თავად მოწმემ კი აღნიშნა, რომ კახეთშია და დაკრძალვის პროცესს ესწრება.

რაც შეეხება უგულავას, ის თვლის, რომ პროკურატურამ გვაშელიშვილი სპეციალურად გადამალა:

"ეს რასაც ეხლა სასამართლო აკეთებს, პროკურატურა აკეთებს და მართლმსაჯულება აკეთებს, ეს წარმოაჩენს ზუსტად. მთელი სისტემა მომართულია იქითკენ როგორ დამალონ გავაშელიშვილი. ჩვეულებრივი თაღლითია ეს გავაშელიშვილი, თაღლითებს ემსახურება მოსამართლის და პროკურატურის გასაგონად მინდა ვთქვა, ბარონ მიუნ ჰაუზენივით თავს ვერ ამოყოფს ჭაობიდან, ჭაობაშია ეს სისტემა", - განაცხადა უგულავამ.