იუსტიციის უმაღლეს სკოლაში საგანგებო შეხვედრა დასრულდა. შეკრების შემდეგ იუსტიციის უმაღლესი საბჭოს წევრმა, დიმიტრი გვრიტიშვილმა განცხადება გააკეთა და თქვა, რომ შემუშავდა წერილობითი განცხადება, რომელსაც ხელს მოსამართლეები აწერენ.

განცხადებაში ნათქვამია, რომ აუცილებელია ყველას მხრიდან, შეწყდეს, დისკრიმინაციული და არასწორი შეხედულებების გავრცელება სასამართლო სისტემისა და მოსამართლეების მიმართ.

"ყურადღება გამახვილდა ისეთ მიუღებელ ფორმებზე, როგორიცაა სატელევიზიო კლიპებისა და სპეციალური ფილმების დამზადებაც და მიწოდება საზოგადოებისთვის, რისი მიზანიც ერთადერთია, რომ სასამართლო ხელისუფლებას, უსაფუძვლოდ შეელახოს იმიჯი ჩვენ საზოგადოებაში.

დავაფიქსირეთ მოთხოვნა ყველას მიმართ, სხვა სახელისუფლებო შტოები, არასამთავრობო ორგანიზაციები თუ სხვა ნებისმიერი სუბიექტი, ვინც ჩართულია, რამენაირი ფორმით პოლიტიკურ სამართლებრივ დისკუსიებში, და აფიქსირებს საკუთარ მოწოდებებს და ულტიმატუმების ენით საუბრობს, მოვუწოდებთ, რომ შეწყვიტოს სასამართლო ხელისუფლების დამოუკიდებლობაში ჩარევა და მისი ხელყოფის მცდელობა",- თქვა დიმიტრი გვრიტიშვილმა.