2018-2021 წლებში თბილისში ოთხი მუზეუმი რეაბილიტირდა. კერძოდ, ნიკოლოზ ბარათაშვილის, გალაკტიონის, კოტე და სოსო წერეთლების სახლ-მუზეუმები და ილია ჭავჭავაძის ლიტერატურულ-მემორიალური მუზეუმი.

მუზეუმების განახლების მიზნით განხორციელებულ და დაგეგმილ პროექტებზე კულტურის, განათლების, სპორტისა და ახალგაზრდობის პოლიტიკის ანგარიშის პრეზენტაციაზე თბილისის მერის მოადგილე ანდრია ბასილაიამ ისაუბრა.

მისი თქმით, უახლოეს მომავალში გაიხსნება ილია ჭავჭავაძის ახლადრეაბილიტირებული მუზეუმი.

როგორც ანდრია ბასილაიამ აღნიშნა, გამოსყიდულია მერაბ-კოსტავას სახლ-მუზეუმის შენობა.

„ჩვენი ეროვნული გმირის, მერაბ კოსტავას სახლ-მუზეუმის ნაწილი, სამწუხაროდ, წლების განმავლობაში იყო კერძო საკუთრებაში და შარშან დეკემბერში დავასრულეთ გამოსყიდვის პროცესი. ახლა მიმდინარეობს პროექტირება და მომავალ წელს, მერაბ კოსტავას ექნება ისეთი მუზეუმი, როგორსაც ის იმსახურებს“, - განაცხადა თბილისის მერის მოადგილემ.

მისივე თქმით, დაწყებულია ჩუბინაშვილის ქუჩაზე მდებარე, ილია ჭავჭავაძის მეორე, ე.წ. „პატარა“ სახლ-მუზეუმის კვლევა-პროექტირება, რათა მომავალში მისი რეაბილიტაციაც განხორციელდეს.

„გარდა ამისა, ძალიან მნიშვნელოვანია, რომ თბილისის მუზეუმების გაერთიანება დაუბრუნდა სამუზეუმო საქმეს და ატარებს სხვადასხვა ვორქშოფს, რომელშიც ბევრი ახალგაზრდა ერთვება. გარდა ამისა, გამოსცა არაერთი საერთაშორისო გამოცემა, რაც ძალიან მნიშვნელოვანია“, - აღნიშნა ანდრია ბასილაიამ.