უდუმაშვილი ღარიბაშვილს: "მარწყვის საკრეფად მიდიან გერმანიაში, ეს არის ეკონომიკური გეგმა?"

პოლიტიკა - 16:43, 25 Jun, 2021

673

პარლამენტში პრემიერ ღარიბაშვილს ყოველწლიური მოხსენების ფარგლებში უსმენდნენ, რის შემდეგაც დეპუტატებს მისთვის კითხვების დასმის საშუალება მიეცათ. ღარიბაშვილს ენმ-ს წევრმა ზაალ უდუმაშვილმაც მიმართა და სამუშაო ადგილების შექმნისა და ეკონომიკური სიდუხჭირიდან გამოსავლის გეგმის შესახებ ჰკითხა. უდუმაშვილი ასევე შეეხო კოვიდრეგულაციების დარღვევის გამო ჯარიმების ამნისტიას:

"რამდენიმე დღის წინ თქვენ გამოხვედით ინიციატივით, ჯარიმების ამნისტიის შესახებ, რომელიც ეხება კოვიდპერიოდში დაჯარიმებულ ჩვენს თანამოქალაქეებს. მე მაინტერესებს, რა დაგიშავათ იმ ჩვენმა პატიოსანმა, კეთილსინდისიერმა და კანონმორჩილმა თანამოქალაქეებმა, რომლებმაც დაჯარიმების შემდეგ ადგნენ, წავიდნენ, შესაძლოა, ეს თანხა ისესხეს, იმიტომ რომ ჯარიმები საკმაოდ სოლიდური იყო, და გადაიხადეს. მე მაინტერესებს, რატომ ისჯება ჩვენს ქვეყანაში სახელმწიფო ინსტიტუტების პატივისცემა და კანონმორჩილება.

მეორე საკითხი - 2012 წლის შემდეგ სამუშაო ძალა ქვეყანაში 133 ათასი კაცით შემცირდა. მე გაგახსენებთ თქვენს დაპირებას, რომ ქვეყანაში 200 ათასი სამუშაო ადგილი უნდა გაჩენილიყო. ის, რომ სამუშაო ადგილებ ვერ შეიქმნა, ამაში არგუმენტად კოვიდპანდემია არ გამოგადგებათ, იმიტომ, რომ პანდემია ერი წელია, რაც დაიწყო და მანამდე მთელი 8 წელი გქონდათ, ეს პრობლემა მოგეგვარებინათ. მხოლოდ 2016 წლიდან 2020 წლამდე სამუშაო ადგილები 53 ათასით შემცირდა. რაშია გამოსავალი? თქვენ დღეს სიამაყით აცხადებთ, რომ თურმე ჩვენი თანამოქალაქეები მარწყვის საკრეფად მიდიან გერმანიაში, მე მაინტერესებს, ეს არის ხელისუფლების გეგმა?" - მიმართა უდუმაშვილმა ღარიბაშვილს.