არასამთავრობო ორგანიზაცია „პირველი ნაბიჯი – საქართველოს“ და “საქართველოს ბანკისა“ ერთობლივი ძალისხმევით, დღეს, 19:00 საათზე სასტუმრო „რედისონ ბლუ ივერიაში“ ზამთრის საქველმოქმედო გალა–კონცერტი გაიმართება.

„პირველი ნაბიჯი – საქართველო“ ნინო ქადაგიძე-ჟვანიასა და ჯეინ ქორბოის დაარსებული ორგანიზაციაა საქართველოში, არასამთავრობო ორგანიზაცია ყოველწლიურად ატარებს ხსენებულ ღონისძიებას. ორგანიზატორთა ინფორმაციით, ღონისძიების მიზანს მძიმე ფიზიკური და ინტელექტუალურად შეზღუდული შესაძლებლობის მქონე 18 წლამდე ბავშვებისა და ახალგაზრდა ბენეფიციარებისთვის ფინანსური სახსრების მოზიდვა წარმოადგენს.

|ორგანიზაცია მათ უზრუნველყოფს უმნიშვნელოვანესი, მაღალი ხარისხის მომსახურებით, რომელსაც ისინი სხვანაირად მოკლებული იქნებოდნენ. ღონისძიების ფარგლებში შემოსული თანხა სრულად მოხმარდება „პირველი ნაბიჯი – საქართველოს“ პროგრამებსა და პროექტებში ჩართულ განსაკუთრებული საჭიროების მქონე ბავშვებს, რომლებიც სოციალურად დაუცველი ოჯახებიდან არიან და სასიცოცხლოდ საჭიროებენ დღის ცენტრის, ადრეული განვითარებისა და შინმოვლის პროგრამებში ჩართვას. ზემოხსენებული ღონისძიების ფარგლებში წარმოგიდგენთ ახალგაზრდა ქართველი ვირტუოზის, ჯაზის შემსრულებლის, „ჯულიარდის სკოლის“ სტუდენტის ბექა გოჩიაშვილის პირველ საქველმოქმედო კონცერტს – ბექა გოჩიაშვილთან ერთად შეზღუდული შესაძლებლობის მქონე ბავშვებისთვის კონცერტში ასევე მონაწილეობენ – ცნობილი ქართველი მუსიკოსი თამაზ ყურაშვილი და ახალგაზრდა ვოკალისტი ნატალია ქუთათელაძე.

საღამოს ფარგლებში, ხელოვნების ნიმუშების აუქციონი გაიმართება და ლატარიის ბილეთები გათამაშდება“, - აცხადებენ ღონისძიების ორგანიზატორები.