ქუთაისში საკეისრო კვეთის შედეგად გარდაცვლილი 21 წლის სოფო კვარაცხელიას ოჯახი ირწმუნება, რომ გოგონას ჯანმრთელობის პრობლემები არ ჰქონია და ის ექიმების დაუდევრობით დაიღუპა.

როგორც გარდაცვლილის ახლობლები აცხადებენ, მშობიარე გოგონა შეუძლოდ გახდა, თუმცა კლინიკაში თავისი ფეხით შევიდა. მათი თქმით, არ იციან, რამ გამოიწვია საკეისრო კვეთის შემდეგ გართულებები.

აღნიშნულ ფაქტთან დაკავშირებით კლინიკა "ბომონდმა" სპეციალური განცხადება გაავრცელა, სადაც წერია, რომ ახალგაზრდას თანმხლები დაავადებები ჰქონდა, რის გამოც მისი გადარჩენა ვერ მოხერხდა:

"პაციენტი კლინიკაში მიმდინარე წლის 20 ივნისს, მეუღლის მიერ, მოყვანილ იქნა მძიმე მდგომარეობაში. მას ჩაუტარდა გადაუდებელი საკეისრო კვეთა. ახალშობილი გადაყვანილია კლინიკის ახალშობილთა ინტენსიური თერაპიის განყოფილებაში. ყველა ჩატარებული სამედიცინო ღონისძიების მიუხედავად, თანმხლები დაავადების გამო, მელოგინის გადარჩენა ვერ მოხერხდა", - წერია საავადმყოფოს განცხადებაში.