ხორავას ქუჩის საქმე - პროკურატურა მიხეილ კალანდიას მიმართ დანაშაულის შეუტყობინებლობის ეპიზოდში სისხლის სამართლებრივი დევნის შეწყვეტას ითხოვს.

შესაბამისი შუამდგომლობით პროკურორმა მოსამართლეს დღევანდელ პროცესზე მიმართა.

ბრალდების მხარემ სასამართლოში კალანდიას მიმართ 3 სასამართლოს მიერ გამოტანილი განაჩენი დამატებით მტკიცებულებად წარმოადგინა, რომლის საფუძველზეც დანაშაულის შეუტყობინებლობის ეპიზოდში კალანდიას მიმართ სისხლის სამართლებრივი დევნა უნდა შემწყდარიყო.

თოდუამ სასამართლო პროცესზე განაცხადა, რომ ის პროკურატურის შუამდგომლობას არ ეთანხმება, მისი დასაბუთება არარელევანტური და სპექტაკლში მონაწილეობას არ მიიღებდა. ადვოკატის თქმით, საქმე პოლიტიკური დაკვეთით მიმდინარეობს და რომ პროკურატურას აღნიშნული შუამდგომლობის დაყენება 3 წლის განმავლობაში შეეძლო. თოდუამ პროკურატურას საპროცესო შეთანხმების შუამდგომლობით მიმართა.

პროკურორ გიორგი ქობულაძის განცხადებით, საქმეზე პოლიტიკური ზეგავლენა გამორიცხულია. მისივე განმარტებით, ამ დრომდე საქმის შეწყვეტის შუამდგომლობას ვერ დააყენებდნენ, ვინაიდან კალანდიას მიმართ სამივე ინსტანციის სასამართლოს გადაწყვეტილება იყო საჭირო.

რაც შეეხება საპროცეო შეთანხმებას, როგორც პროკურორმა განმარტა, ამ პირობებში საპროცესო შეთანხმებაზე თანხმობას ვერ დააფიქსირებს, რადგან ბრალდების მხარე ამბობს, რომ კალანდიას ეს დანაშაული არ ჩაუდენია.

ადვოკატმა ზურაბ თოდუამ პოზიციის დასაფიქსირებლად დრო ითხოვაამის გამო სხდომა 24 ივნისს, 11:30 საათზე გაიმართება.

შეგახსენებთ, სამართალდამცავებმა მიხეილ კალანდია 2019 წლის 4 ივნისს დააკავეს. ის თბილისის საქალაქო სასამართლომ დამნაშავედ ცნო და 15 წლით თავისუფლების აღკვეთა შეუფარდა, არასრულწლოვანთა მართლმსაჯულების კოდექსით, სასჯელი 11 წლითა და 3 თვემდე შემცირდა

გადაწყვეტილება ძალაში დატოვა თბილისის სააპელაციო სასამართლომ. უზენაესმა კი, საკასაციო საჩივარი დაუშვებლად მიიჩნია. აღნიშნულ საქმეზე საჩივარი სტრასბურგის სასამართლოშია გაგზავნილი.