ზაზა გახელაძის მამა დღეს პრემიერ ღარიბაშვილს კიდევ ერთხელ შეხვდა. ეს შეხვედრა ულტიმატუმის ვადის ამოწურვამდე ერთი დღით ადრე მოხდა. წინა შეხვედრაზე, რომელიც გასულ თვეს გაიმართა, ღარიბაშვილმა გახელაძეების ოჯახთან პირობა დადო, რომ მაისის ბოლოს ოკუპანტების ტყვეობაში მყოფი ზაზა გახელაძე საკუთარ სახლში დაბრუნდებოდა.

პირობა ვერ შესრულდა, ზაზა გახელაძე ისევ უკანონო პატიმრობაშია, ოჯახმა კი მთავრობას ულტიმატუმი წაუყენა და ახალი ვადა მისცა - თუ 23 ივნისს, საკუთარ იუბილეზე ზაზა ოჯახს არ დაუბრუნდება, ოჯახი წავა ცხინვალში.

დღევანდელ შეხვედრაზე ღარიბაშვილმა საკუთარი პირობა უარყო და მიხელ გახელაძეს უთხრა, რომ ოჯახმა ისი სიტყვები სხვანაირად გაიგო:

"მაინტერესებდა რას მეტყოდა, ჩავედი ღარიბაშვილთან, რადგან დაგვპირდით, რომ 2 კვირაში ზაზა უნდა გამოსულიყო და ვერ გამოიყვანეთ-მეთქი, თქვენ სხვანაირად გაიგეთო, ალბათ, ეს სიტყვა ეგრე არ მითქვიაო. კონკრეტული არაფერი არ გვითხრა... გვირჩია არ გადავსულიყავით, წამოსვლისას ვუთხარი რახან ვთქვი, მაინც უნდა გადავიდე.

1 წელი ჰქონდათ დრო, რომ რამე გაეკეთებინათ, ამ 1 წლის განმავლობაში ვერაფერი გააკეთეს და მე რაც ვთქვი, გავაკეთებ მაგას", - აღნიშნა ზაზა გახელაძის მამამ.

ხვალვე დაგეგმილია აქცია და საავმტომობილო მსვლელობა ცენტრალური მაგისტრალისკენ, რომელში მონაწილეობასაც გახელაძეების ოჯახთან ერთად მისი თანასოფლელები, ახლობლები, სამოქალაქო აქტივისტები და პოლიტიკოსები მიიღებენ.