„20 ივნისი ჯერ არ არის წარსული და არ იქნება წარსული მანამ სანამ თქვენ, კოლექტიური როდიონოვები იქნებით ხელისუფლებაში და ქართველი საზოგადოებისთვის და ქართველი ხალხისთვის სულ ერთია ვინ ვის გადააბრალებს 20 ივნისის სისხლიან ღამეს. თქვენ არ გაქვთ ყველაზე მთავარ კითხვაზე პასუხი. რატომ მისცეს იმ დღეს პოლიციელებს ქართველი ხალხისთვის სასროლად დათვის მოსაგერიებელი ტყვიები, რომელიც არ შედის სპეცრაზმის ყოველდღიურ შეიარაღებაში. და რაც არ უნდა სცადოთ თქვენ ამ ამნისტიით ამ სისხლის ჩამორეცხვა, მაინც ვერ მიაღწევთ იმას, რომ გადაწეროთ ისტორია",- ამის შესახებ პარლამენტის პლენარულ სხდომაზე ფრაქცია – „ერთიანი ნაციონალური მოძრაობა – გაერთიანებული ოპოზიცია-ძალა ერთობაშია" წევრმა ანი წითლიძემ განაცხადა.

მისი თქმით, ადგილობრივი არჩევნები იქნება ტესტი დემოკრატიისთვის.

„20 ივნისი არ არის და არ იქნება წარსული მანამ, სანამ თქვენი ხელისუფლების ერთი წარმომადგენელი მაინც იქნება ხელისუფლებაში. ცოტა ხნის წინ ამერიკის ელჩმა გითხრათ, რომ ადგილობრივი არჩევნები იქნება ტესტი დემოკრატიისთვის. მე გეტყვით უფრო მეტს, ეს არჩევნები იქნება ეროვნული ღირსების არჩევნები, როდესაც თქვენ მოგიწევთ ვადამდელი არჩევნების დანიშვნა და ოპოზიციაში წასვლა. მხოლოდ ამის შემდეგ იქნება 20 ივნისი წარსული", - განაცხადა ანი წითლიძემ.