ფრაქცია "ძალა ერთობაშიას" თავმჯდომარე ხატია დეკანოიძე ფრაქცია "ქართული ოცნების" თავმჯდომარეს მამუკა მდინარაძეს პასუხობს და მის გუშინდელ განცხადებას უტიფარ ტყუილს უწოდებს. დეკანოიძის თქმით, "ნაციონალურ მოძრაობას" 2008 წლის ომის საქმეზე მტკიცებულებები არავისთვის დაუმალავს და იმავე წელს ჩააყენეს საერთაშორისო პარტნიორები საქმის კურსში:

"რა თქმა უნდა, იქ სადაო პუნქტებია, მაგრამ პირველად მოხსენიებულია რუსეთის ოკუპაცია, რომელიც ძალიან მნიშვნელოვანი იყო, ჩვენი საერთაშორისო პარტნიორების მხარდაჭერით.

ისკანდერზეც უნდა ვთქვა - ძალიან მწვავე და უტიფარი ტყუილი ბრძანა ბატონმა მდინარაძემ, რომ დამალესო. არა - ჩვენ 2008 წელსვე ჩვენს პარტნიორებს გადავეცით, იმისთვის რომ ექსპერტიზა ჩატარებულიყო, რომ ნამდვილად ეს რუსეთი მიერ გამოყენებული უმძიმესი ლეტალური იარაღი იყო. ეს იყო იმ ადგილას, რომელიც ძალიან კარგად იცოდა ქართულმა ოცნებამ, შემდეგ უკვე მტკიცებულებებისთვის დასჭირდათ და გააგზავნეს. ეს არის სრული მტკნარი ტყუილი, არავის არაფერი დაუმალავს, უფრო მეტიც ჩვენ 2008 წელსვე ჩვენი პარტნიორები საქმის კურსში ჩავაყენეთ", - განაცხადა დეკანოძემ.

შეგახსენებთ, მამუკა მდინარაძემ გიორგი გაბუნიას გადაცემაში ენმ აგვისტოს ომის საქმეზე მტკიცებულებების დამალვაში დაადანაშაულა. მან ასევე თქვა, რომ პარტიამ ევროსაბჭოს რეზოლუციის იმ დოკუმენტს მოაწერა ხელი, რომელიც საომარ მოქმედებებში ქართულ მხარეს ადანაშაულებს.